جاسى 35 كە دەيىنگى وتباسىلار جاڭا باعدارلاما بويىنشا پاتەر الا الادى
«باعدارلاما جاس وتباسىلارعا ارنالعان، ءبىز ۇكىمەتپەن بىرگە جاسى 35 كە دەيىنگى ازاماتتاردىڭ دا پاتەرلەرگە ۇمىتكەر بولۋىن قاراستىرىپ جاتىرمىز. بارلىق پاتەردىڭ 50 پايىزى جاس ازاماتتارعا، جاسى 35 كە دەيىنگى وتباسىلارعا ۇسىنىلاتىن بولادى. ءبىز «جاس وتباسى» ۇعىمىنىڭ زاڭدا 29 جاسقا دەيىن دەپ كورسەتىلگەن انىقتاماسىنان باس تارتىپ، وسى باعدارلامانىڭ ماقساتى ءۇشىن بۇل مەجەنى 35 كە دەيىن ۇلعايتامىز»، - دەدى بيشىمبايەۆ. بۇعان دەيىن ۇلتتىق ەكونوميكا ۆيتسە-ءمينيسترى قايىربەك وسكەنبايەۆ جاڭا تۇرعىن ءۇي باعدارلاماسى شەڭبەرىندە جاس وتباسىلاردىڭ جاس شاماسى 29 دان 35 كە دەيىن وزگەرتىلۋى مۇمكىن ەكەنىن حابارلاعان بولاتىن.
بيشىمبايەۆ جاڭا باعدارلاما بويىنشا باسپانالاردىڭ تەك كەزەكتە تۇرعان ادامدارعا عانا بولىنەتىنىن ايتتى. «بۇل باعدارلاماعا ۇمىتكەرلەردى 2014 -جىلعى 11- قاراشاداعى مالىمەت بويىنشا جەرگىلىكتى اتقارۋشى ورگانداردا كەزەكتە تۇرعاندار، ياعني تۇرعىن ءۇي جاعدايىن جاقسارتۋعا مۇقتاج نەمەسە باسپاناسى جوق ازاماتتار اراسىنان جاساقتايمىز»، - دەدى ول.
سونىمەن بىرگە، باعدارلاما ارقىلى كوپبالالى وتباسىلار، تولىمسىز وتباسىلار، جەتىم بالالار، ءبىلىم بەرۋ، دەنساۋلىق ساقتاۋ سالاسى جۇمىسشىلارى مەن مەملەكەتتىك قىزمەتكەرلەر دە پاتەر الا الادى. «باسپانالاردىڭ 50 پايىزى جاسى 35 كە دەيىنگى، تۇرعىن ءۇيى جوق، جەرگىلىكتى اتقارۋشى ورگانداردىڭ كەزەگىندە تۇرعان وتباسىلارعا بەرىلەدى، قالعان جارتىسى كەزەكتە تۇرعان الەۋمەتتىك ءالجۋاز توپتارىنا بەرىلەدى»، - دەدى بيشىمبايەۆ.
ەسكە سالا كەتەيىك، قازاقستان پرەزيدەنتى نۇرسۇلتان نازاربايەۆ «نۇرلى جول» ساياساتى اياسىندا جاڭا تۇرعىن ءۇي باعدارلاماسىنىڭ قولعا الىناتىنىن 2014-جىلعى 11- قاراشادا جاريا ەتىلگەن جولداۋىندا ايتقان ەدى. بۇل باعدارلاما بويىنشا تۇرعىن ءۇي العاشقى جارناسىز ءارى پايىزسىز بەرىلۋى ءتيىس. سونىمەن بىرگە، جاڭا تۇرعىن ءۇي باعدارلاماسى بويىنشا باسپانانىڭ ءبىر شارشى مەترىنىڭ قانشا تۇراتىنى دا جاريا ەتىلدى.
