ەلوردادا 351 رەت ەرەجە بۇزعان كولىك جۇرگىزۋشىسىنە 7 ميلليون تەڭگە ايىپپۇل سالىندى

نۇر-سۇلتان. قازاقپارات - نۇر-سۇلتان قالالىق پوليتسيا دەپارتامەنتىنىڭ قىزمەتكەرلەرى 351 رەت ەرەجە بۇزعان كولىك جۇرگىزۋشىسىن ۇستادى.

ۇستالعان جىگىت قىرعىز رەسپۋبليكاسىنىڭ ازاماتى بولىپ شىقتى، دەپ حابارلايدى قازاقپارات ءتىلشىسى.

«ەسىل اۋداندىق پوليتسيا باسقارماسىنا تاكسي جۇرگىزشىلەرىنىڭ ءبىرى جۇگىنىپ، تۇران داڭعىلىنىڭ بويىمەن «سۋبارۋ وۋتباك» ماركالى اۆتوكولىكتىڭ كۇندە جول ەرەجەسىن ورەسكەل بۇزاتىنىن حابارلادى. پوليتسيا قىزمەتكەرلەرى تەرگەۋدى باستاپ، اتالمىش كولىكتى جۇرگىزگەن قىرعىزستان ازاماتىن ۇستادى. «سەرگەك» كامەرالارىن زەرتتەۋ بارىسىندا ونىڭ جول ءجۇرۋ ەرەجەسىن 351 رەت بۇزعانى انىقتالدى. ول 77 رەت قوعامدىق كولىكتىڭ جولىنا شىعىپ كەتسە، 274 رەت جىلدامدىق رەجيمىن ارتتىرعان. قالا ىشىندە كەيدە ساعاتىنا 142 شاقىرىممەن جۇرگەن. جۇرگىزۋشىگە جالپى سوماسى 7 ميلليون تەڭگە ايىپپۇل سالىندى»، - دەپ حابارلايدى قالالىق پوليتسيا دەپارتامەنتىنەن.

«سۋبارۋ وۋتباك» ماركالى اۆتوكولىك كوممۋنالدىق تۇراققا قويىلعان. سەبەبى ستاندارتقا ساي كەلمەيتىن باسەڭدەتكىشتى قويىپ، ول جىگىت اۆتوكولىگىن قايتا قۇرىلىمداپ العان. بۇگىن پوليتسيا قىزمەتكەرلەرى «جولداعى قابىلداۋ» رەسپۋبليكالىق اكتسياسىن اياقتايدى. ساعات 19.00 گە دەيىن پوليتسيا قىزمەتكەرلەرى ارنايى جاساقتالعان اۆتوبۋستار ارقىلى حالىقتى قابىلدايدى»، - دەلىنگەن حابارلامادا.