مەكتەپ اسحاناسىندا جارتى ليتر سۋ باعاسى 350 تەڭگە - مينيستر ماسەلەنى شەشۋ تۋرالى ايتتى

نۇر-سۇلتان. قازاقپارات - مەكتەپ اسحانالارىنداعى اس ءمازىرىن قايتا قاراۋ كەرەك.

بۇل تۋرالى ق ر وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

مينيسترلىكتىڭ اپپارات جينالىسىندا اسحات ايماعامبەتوۆ مەكتەپتەردە بالالاردى ىستىق تاماقپەن قامتاماسىز ەتۋ ماسەلەسىنە توقتالدى.

«قازىر ىستىق تاماقپەن قامتاماسىز ەتۋ كورسەتكىشى ءوسىپ وتىر دەيمىز. ءبىراق ودان بولەك ءقازىردىڭ وزىندە ىستىق تاماقپەن قامتاماسىز ەتىپ وتىرعان اسحانالاردىڭ جۇمىسىن جەتىلدىرۋدە جۇيەلى جۇمىس بولۋى كەرەك. ول بويىنشا كوميتەت ءتيستى زاڭنامالىق وزگەرىستەر دايىندادى. اس ءمازىرىن دەنساۋلىق ساقتاۋ مينيسترلىگىمەن بىرگە جاڭادان قاراۋىمىز كەرەك»، - دەدى ول.

مينيستر مەكتەپ بۋفەتتەرىندە باعاعا قاتىستى دا پروبەمانىڭ بار ەكەندىگىن باسا ايتتى.

« ءار ءبىلىم ءبولىمى، ءار ءبىلىم باسقارماسى بۇعان كوڭىل ءبولۋى كەرەك. ەلوردا مەكتەپتەرىنىڭ وزىندە باعانىڭ ءوسۋى بار. 0,5 ليتر سۋدىڭ باعاسى 350 تەڭگە دەگەن ماسقارا. باسقا وبلىستار دا مەكتەپ اسحانالارىنداعى باعانى قاراڭىزدار. وسى ماسەلەنى جۇيەلى شەشۋ ءۇشىن ءتيىستى زاڭنامالىق وزگەرىستەر ەنگىزەمىز. جاڭا وقۋ جىلىنا دەيىن بۇل پروبلەما شەشىلۋى كەرەك»، - دەدى اسحات ايماعامبەتوۆ.

سونىمەن قاتار ول بالالاردى ءقاۋىپسىز تاپسىمالداۋ ءۇشىن بيىل 515 اۆتوبۋس ساتىپ الىناتىندىعىن اتاپ ءوتتى.

«ول جۇمىستى تامىز ايىنا دەيىن ءبىتىرۋىمىز كەرەك. كەيبىر وڭىرلەر بۇل جۇمىستى ءالى باستاعان دا جوق. ءبىز رەسپۋبليكالىق دەڭگەيدە بۇل ماسەلەنى سىزدەرگە شەشتىك، ءتيىستى قۇرالداردى بەردىك. ماسەلە جالپى شەشىلىپ وتىر. ەندى سونى اياعىنا دەيىن جەتكىزىپ، جۇمىستى جاڭا وقۋ جىلىنىڭ باسىنا دەيىن ءبىتىرۋ قاجەت»، - دەدى مينيستر.

اۆتور: مارلان جيەمباي