قازاقستاندا رەسپۋبليكالىق ماڭىزى بار جولداردا 350 دەن استام كامەرا ورناتىلدى

نۇر-سۇلتان. قازاقپارات - ەلىمىزدىڭ تاس جولدارىندا بەينەباقىلاۋ كامەرالارىن ورناتۋ جالعاسۋدا.

بۇل اقىلى جولداردا اقى ءوندىرۋ جۇيەسىن ورناتۋ بويىنشا ينۆەستيتسيالىق جوبانىڭ اياسىندا قاراستىرىلعان، دەپ حابارلايدى قازاقپارات.

بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنىڭ Telegram كانالىنان ءمالىم بولدى، دەپ حابارلايدى قازاقپارات.

بۇگىنگە دەيىن ينۆەستور 374 كامەرا ورناتقان. ولار ازىرگە تەستى رەجيمىندە جۇمىس ىستەپ جاتىر. اقى ءوندىرۋ جۇيەسى ىسكە قوسىلعاندا، باعدارلامالىق- اپپاراتتىق كەشەن اۆتوكولىكتىڭ ءنومىرىن، كلاسىن، قوزعالىس جىلدامدىعى مەن باعىتىن اۆتوماتتى تۇردە انىقتايتىن بولادى. ەگەر اۆتوكولىكتە RFID تاڭباسى ورناتىلسا، تەمىر تۇلپاردى انىقتاۋدىڭ سەنىمدىلىگى اناعۇرلىم ارتاتىنىن ايتىپ وتكەن ءجون.

ماسەلەن، بىرەۋ جالعان نومىرلەرمەن ءجۇرىپ وتسە نەمەسە نومىرلىك بەلگى ناشار كۇيدە بولعان جاعدايدا، جۇيە دۇرىس انىقتاي الماۋى مۇمكىن. مۇنداي كۇماندى جاعدايلاردا RFID تاڭباسى كولىك يەلەرىن ءجۇرىس ءۇشىن زاڭسىز تولەم وندىرۋدەن ساقتايدى.

بەينەتىركەۋدىڭ باستى مىندەتتەرىنىڭ ءبىرى - جولدارداعى جىلدامدىق رەجيمىن بۇزۋ، بەلگىلەنبەگەن جەردە توقتاۋ جانە قارسى باعىتتاعى قوزعالىس جولاعىمەن ءجۇرۋ سياقتى جول ءجۇرۋ ەرەجەلەرىنىڭ بۇزىلۋىن تىركەيدى. 2024 -جىلعا دەيىن رەسپۋبليكالىق ماڭىزى بار 11 مىڭ شاقىرىم جولدا ينۆەستيتسيالىق جوبا اياسىندا 1000 نان استام كامەرا ورناتىلادى دەپ كوزدەلگەن. ولاردىڭ قاتارىندا تىركەۋ كامەرالارى، سونداي-اق كادرلەۋ جانە شولۋ كامەرالارى بولماق.