بۇقار جىراۋدىڭ 350 جىلدىعى: قاراعاندىدا رەسپۋبليكالىق ءمۇشايرا وتەدى

استانا. قازاقپارات - 14 - قىركۇيەك كۇنى قاراعاندىداعى «شالقىما» كونسەرت زالىندا بۇقار جىراۋدىڭ 350 جىلدىعى مەن استانانىڭ 20 جىلدىعىنا ارنالعان «ولەڭ - ءسوزدىڭ داناسى» اتتى رەسپۋبليكالىق ءمۇشايرا وتەدى، دەپ حابارلايدى اكىمدىكتىڭ باسپا ءسوز قىزمەتى.

ءمۇشايرانىڭ ماقساتى - مەملەكەتتىك ءتىلدىڭ مارتەبەسىن ارتتىرۋ، ءتىل مادەنيەتىن كوتەرۋ، بۇقار جىراۋدىڭ ادەبي مۇراسىن جانە تاريحتاعى ەلەۋلى ورنىن ناسيحاتتاۋ، اقىن- جىراۋلاردىڭ شىعارماشىلىعىنا قولداۋ كورسەتۋ ارقىلى جىراۋلىق پوەزيانىڭ دامۋىنا ىقپال ەتۋ. ءمۇشايرانى قاراعاندى وبلىسى اكىمدىگىنىڭ قولداۋىمەن وبلىستىق تىلدەردى دامىتۋ جونىندەگى باسقارماسى ۇيىمداستىردى.

جىر بايگەسىنە 16-35 جاس ارالىعىنداعى ۇمىتكەرلەردىڭ جىراۋلىق پوەزيا ۇلگىسىندە جازىلعان شىعارمالارى قابىلداندى. قاتىسۋشىلار تاراپىنان بۇقار جىراۋعا ارنالعان ولەڭدەرمەن قاتار ەلوردامىز - استانانىڭ 20 جىلدىعى جانە قوعامدىق- الەۋمەتتىك ماسەلەلەردى تولعاعان تۋىندىلار ۇسىنىلدى. بايقاۋعا رەسپۋبليكانىڭ 11 وڭىرىنەن جانە اتالعان وبلىستان بارلىعى 50 ۇمىتكەردەن ءوتىنىم كەلىپ ءتۇستى.

سونىڭ ىشىنەن قازىلاردىڭ قاتال ەلەگىنەن ەكشەلىپ، استانا قالاسى، الماتى، اتىراۋ، جامبىل، قوستاناي، پاۆلودار، تۇركىستان وبلىستارىنان تاڭداۋلى 17 جۇيرىك جۇلدەگە تالاسادى.

ءمۇشايرانىڭ جەڭىمپازى جانە جۇلدەگەرلەر ديپلومدارمەن، العىس حاتتارمەن جانە اقشالاي سىيلىقتارمەن ماراپاتتالادى.

باس جۇلدە -  500000 تەڭگەنى قۇرادى.