يران مەن يراك شەكاراسىنداعى ءزىلزالا قۇرباندارىنىڭ سانى 350 گە جەتتى - كەسكىن
استانا. قازاقپارات - يران مەن يراكتىڭ شەكاراسىندا جەكسەنبى كۇنى كەشكىسىن بولعان جەر سىلكىنىسىنەن قازا تاپقانداردىڭ سانى 350 دەن استى، تاعى 4 مىڭداي ادام زارداپ شەككەن.
بۇل جايلى دۇيسەنبى كۇنى تۋيتتەردەگى رەسمي پاراقشاسىندا Press TV حابارلادى.
ازاماتتىق قورعانىس كۇشتەرىنىڭ وكىلدەرى بەرگەن اقپاراتقا سۇيەنسەك، ايماقتا 7 مىڭ ادامدى قابىلداي الاتىن دالا گوسپيتالدارى قۇرىلعان.
جەرگىلىكتى بيلىك توسەك-ورىن، ازىق-تۇلىك جانە دونور قانى جەتىسپەي جاتقانىن مالىمدەدى. ەڭ كوپ زارداپ شەككەن ءسارپال-ە ءزاحاب قالاسىنداعى گوسپيتال ارتىق ناۋقاس قابىلداي المايتىندىقتان، ارميا تىكۇشاقتارى ولاردى باسقا قالالارداعى اۋرۋحانالارعا، سونىڭ ىشىندە تەگەرانعا تاسىمالداپ جاتىر.
كوپتەگەن تۇرعىندار وتكەن ءتۇندى كوشەدە وت جاعىپ وتكىزدى. تۇندە تەرمومەتر باعانى ءتىپتى ءنول گرادۋسقا دەيىن تومەندەگەن، ءدال قازىر 12 گرادۋس نولدەن جوعارى.
