قورعانىس مينيسترلىگىنىڭ ۇشقىشتارى جانىپ جاتقان ورمان القابىنا 3500 توننادان استام سۋ توكتى
ق ر قورعانىس مينيسترلىگىنىڭ باسپا ءسوز قىزمەتى تاراتقان اقپاراتتارعا قاراعاندا، ارميالىق اۆياتسيانىڭ ۇشقىشتارى ماۋسىمنىڭ 8 ءى مەن 13 ءى ارالىعىندا جانىپ جاتقان ورتكە 3500 توننادان اسا سۋ توكتى.
قالىپتاسقان جاعدايدى ەسكەرە وتىرىپ، قارۋلى كۇشتەردىڭ 600 اسكەري قىزمەتشىسى مەن 50 تەحنيكا ءشۇلبى، تاليتسا، وزەركي، جەرنوۆكا جانە بارىشيەۆكا ۋچاسكەلەرىندەگى ءتىلسىز جاۋمەن كۇرەسكە تارتىلعان.
جاعدايدى اۋەدەن باقىلاۋ ءۇشىن ءۇش ۇشقىشسىز ۇشۋ اپپاراتى قولدانىلۋدا.
توتەنشە جاعدايلار مينيسترلىگىنىڭ ءورت ءسوندىرۋشى ەسەپتوپتارى مەن «شىعىس» وڭىرلىك قولباسشىلىعىنىڭ بولىمشەلەرىنە ارميالىق اۆياتسيا اۋەدەن قولداۋ كورسەتۋدە. ءىس-قيمىلىن «شىعىس» وڭىرلىك قولباسشىلىعى جەدەل شتابىنىڭ 12 اسكەري قىزمەتشىسى ۇيلەستىرىپ وتىراتىن 3 ارنايى توپ جۇمىس ىستەۋدە.
- قولدانىستاعى نورماعا سايكەس ءار ەكيپاجدىڭ اۋىسىمى ءتورت ساعاتقا سوزىلادى. وسى ۋاقىت ىشىندە تىكۇشاقتار 30-35 رەت سۋ توگەدى. بۇل ورتا ەسەپپەن 100 توننا سۋ، - دەگەن ستاتيستيكانى كەلتىردى 30131 اسكەري ءبولىمى كومانديرىنىڭ ورىنباسارى پودپولكوۆنيك رۋسلان يۋماشيەۆ.
69 ادامنان تۇراتىن 23 ۇشۋ ەكيپاجى ناقتى جانە ۇيلەسىمدى ارەكەت ەتۋدە. ماسەلەن تىكۇشاقتان جەكە دارا سۋ توگۋ ادەتتە ءتيىمسىز. بۇل ءبىر وشاققا ءۇش توننا عانا سۋ دەگەن ءسوز. ەگەر التى تىكۇشاقپەن ۇشسا ءبىر ماقساتتا جۇمىس ىستەيدى. كەيدە 40 سەكۋندتا ءبىر جەرگە 30 توننا سۋ توگۋگە بولادى.
ۇشقىشتاردان كەيىن ت ج م- ءنىڭ جەردەگى ءورت ءسوندىرۋشى ەسەپتوپتارى جالىندى اۋىزدىقتاۋدا. ولاردىڭ سوڭىن الا اباي گارنيزونىنىڭ اسكەري قىزمەتشىلەرى ىسكە كىرىسەدى. اسكەريلەر جانىپ جاتقان اعاشتاردى قۇلاتىپ، بىقسىعان وتتى ءوشىرىپ جاتىر. جۇمىس كۇندىز-ءتۇنى توقتاماي جۇرگىزىلۋدە.
سونداي-اق اسكەري قىزمەتشىلەردىڭ دەر كەزىندە تاماقتانۋى مەن دەمالىپ كۇش جيناۋىنا ۋاقىت بولىنگەن.
اۋقىمدى اپات ايماعىندا قارۋلى كۇشتەردىڭ بارلىق بولىمشەلەرىنىڭ ءىس-قيمىلىن ۇيلەستىرۋدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ جۇزەگە اسىرۋدا.
توتەنشە جاعدايلار مينيسترلىگىنىڭ جەدەل شتابىمەن، جەرگىلىكتى اكىمشىلىكپەن بىرلەسىپ، ول ورتكە قارسى ءىس-شارالارعا قاتىساتىن جەكە قۇرامنىڭ مىندەتتەرىن ايقىنداۋدا.
