3,5 ميلليون ادام ونكولوگيانى ەرتە انىقتايتىن سكرينينگتەن وتە الماي وتىر - دەپۋتات

استانا. KAZINFORM - ءماجىلىس دەپۋتاتى اسحات ايماعامبەتوۆ 3,5 ميلليون ازاماتىمىز ونكولوگيانى ەرتە انىقتايتىن سكرينينگتەن وتە الماي وتىرعانىن ايتتى.

- 3,5 ميلليون ازاماتىمىز ونكولوگيانى ەرتە انىقتايتىن سكرينينگتەن وتە الماي وتىر، سەبەبى ولار م ءا م س- كە جارنا تولەمەيدى. بۇل - بۇگىنگى كۇننىڭ شىندىعى. ءبىراق قاتەرلى ىسىك - ۇزاق ۋاقىت بويى ەش بەلگى بەرمەيتىن قاۋىپتى اۋرۋ. ال العاشقى بەلگىلەرى پايدا بولعاندا، كوپ جاعدايدا تىم كەش بولىپ جاتادى: مەتاستازدار، اۋىرسىنۋ، جوعالعان ومىرلەر، - دەپ جازدى دەپۋتات الەۋمەتتىك جەلىدەگى پاراقشاسىندا.

اسحات ايماعامبەتوۆ ماسەلەنى شەشۋ ءۇشىن ءبىر جىلدان استام ۋاقىت بويى جۇمىس ىستەلىپ جاتقانىن ايتتى.

- بۇل تەك ستاتيستيكا ەمەس - بۇل مىڭداعان وتباسىنىڭ تراگەدياسىنا اينالۋى مۇمكىن. بۇل ءبىزدىڭ دوستارىمىز، كورشىلەرىمىز، تۋىستارىمىز. بۇل ماسەلەنى شەشۋ ءۇشىن ءبىر جىلدان استام ۋاقىت بويى جۇمىس ىستەپ كەلەمىز. جاقىندا بارلىق ازامات ءۇشىن، ونىڭ ىشىندە م ءا م س- كە جارنا تولەمەگەندەر ءۇشىن دە، ونكولوگيالىق سكرينينگتى قولجەتىمدى ەتۋدى قاراستىراتىن تۇزەتۋ ەنگىزدىك. ءيا، بۇل قوسىمشا قارجى تالاپ ەتەدى، ءبىراق بۇل كوپتەگەن ادامنىڭ ءومىرىن قۇتقارادى، - دەدى اسحات ايماعامبەتوۆ.

ول قاتەرلى ىسىكتى ەرتە كەزەڭدە انىقتاۋ مەملەكەتكە كەش انىقتالعان جاعدايلاردى ەمدەۋگە جۇمسالاتىن شىعىنداردى ازايتۋعا مۇمكىندىك بەرەتىنىن ايتتى.

- ادامگەرشىلىك تۇرعىسىنان بۇل - دۇرىس شەشىم. ال ەكونوميكالىق تۇرعىدان بۇل - پراگماتيكالىق قادام. سەبەبى قاتەرلى ىسىكتى ەرتە كەزەڭدە انىقتاۋ مەملەكەتكە كەش انىقتالعان جاعدايلاردى ەمدەۋگە جۇمسالاتىن شىعىنداردى ازايتۋعا مۇمكىندىك بەرەدى. دەنساۋلىق ساقتاۋ ءمينيسترىنىڭ ءبىزدىڭ وسى باستامامىزعا بەلسەندى تۇردە قولداۋ كورسەتىپ جاتقانى قۋانتادى. ۇكىمەت تە ءوز قورىتىندىسىن بەرىپ ، بۇل باستامامىزدى قولدادى. كەلەسى جىلى بۇل زاڭدى قابىلداپ، مىڭداعان ادامنىڭ ءومىرىن قۇتقارا الامىز دەپ جوسپارلاپ وتىرمىز. بۇل جاي عانا ساندار ەمەس. بۇل - ءبىزدىڭ ازاماتتارىمىزدىڭ ءومىرى، - دەدى ول.

ەسكە سالساق، سكرينينگتەردىڭ ناتيجەلەرى كەزىندە گيپەرتەنزيا، قانت ديابەتى جانە گلاۋكومانىڭ 120 مىڭ جاعدايى انىقتالعانى تۋرالى جازعان بولاتىنبىز.

سونىمەن قاتار، مينيستر سكرينينگ ارقىلى اۋرۋ پاتولوگياسىن انىقتاۋ ۇلەسى تومەن ەكەنىن ايتقان بولاتىن.

اۆتور

گۇلنۇر عازيز قىزى