تۇركياداعى ءزىلزالا قۇرباندارىنىڭ سانى 35,4 مىڭ ادامنان استى

استانا. قازاقپارات - تۇركيانىڭ وڭتۇستىگىندەگى جويقىن ءزىلزالادان قازا تاپقاندار سانى 35418 ادامعا جەتتى. بۇل تۋرالى رەسپۋبليكانىڭ مينيسترلەر كابينەتىنىڭ قورىتىندىسى بويىنشا تەلەۇندەۋ جولداعان ەل پرەزيدەنتى رەجەپ تايىپ ەردوعان مالىمدەدى،

دەپ حابارلايدى قازاقپارات انادولى اگەنتتىگىنە سىلتەمە جاساپ.

جينالىس تۇركيانىڭ توتەنشە جاعداي سالدارىن جويۋ باسقارماسىنىڭ انكاراداعى شتاب- پاتەرىندە ءوتتى.

مەملەكەت باسشىسىنىڭ سوزىنشە، جاراقات العان 13208 ادام اۋرۋحانالاردا ەم الىپ جاتىر.

سونداي- اق تۇرىك باسشىسى بۇكىل الەمنىڭ ساراپشىلارى تۇركياداعى جەر سىلكىنىسىن «ايرىقشا تابيعات قۇبىلىسى» دەپ اتاعانىن ايتىپ ءوتتى.

پرەزيدەنت ەردوعاننىڭ سوزىنشە، اپات ايماعىنداعى ىزدەۋ- قۇتقارۋ جانە باسقا دا جۇمىستارعا 250 مىڭعا جۋىق مەملەكەتتىك قىزمەتكەر تارتىلعان.

ول ءزىلزالا قيراتقان اۋداندارداعى ىزدەۋ- قۇتقارۋ جۇمىستارى ءۇيىندى استىنداعى ءتىرى ادامدار امان شىعارىلعانعا دەيىن جالعاساتىنىن اتاپ ءوتتى.

مەملەكەت باسشىسىنىڭ ايتۋىنشا، كەلەسى ايدا تۇركيا بيلىگى ءزىلزالادان زارداپ شەككەندەرگە ارنالعان 30000 ءۇيدىڭ قۇرىلىسىن باستايدى. قازىرگى ۋاقىتتا 1,6 ميلليون ادام باسپاناعا مۇقتاج.

«اپات ايماعىندا 175 مىڭ پالاتكا، 5,4 مىڭ كونتەينەر ۇلگىسىندەگى ءۇي ورناتىلعان»، دەپ اتاپ ءوتتى ەردوعان.

ونىڭ سوزىنشە، تۇركيا بيلىگى ءزىلزالا بولعان ايماقتاردىڭ بارىندە جىل بويى ساپاسى جوعارى ءارى ادامدارعا قاۋىپسىز تۇرعىن ۇيلەردىڭ قۇرىلىسىن اياقتاۋدى جوسپارلاپ وتىر.

سونداي- اق تۇرىك باسشىسىنىڭ سوزىنشە، اپات ايماعىندا 28 مىڭ تۇرىك ساربازى كەزەكشىلىكتە تۇر.

«تۇركيا ۋاقىتى بويىنشا 15- اقپان، 20:00-دە تۇركيا، ازەربايجان جانە سولتۇستىك كيپردەگى تۇرىك رەسپۋبليكاسىندا «تۇركيا - ءبىر جۇرەك» ۇرانىمەن جەر سىلكىنىسىنەن زارداپ شەككەندەرگە كومەك كورسەتەتىن ناۋقان بولادى»، - دەپ تولىقتىردى رەجەپ ەردوعان.

فوتو: انادولى اگەنتتىگى

اۆتور

بالنۇر قوجاگەلدى