كرۋيز لاينەرى ەكيپاجىنىڭ 34 مۇشەسى كوروناۆيرۋس جۇقتىردى
نۇر-سۇلتان. قازاقپارات – جاپونيادا Costa Atlantica كرۋيز كەمەسىنىڭ ەكيپاج مۇشەلەرىنىڭ اراسىندا كوروناۆيرۋس ينفەكسياسىن 30 دان استام ادامنىڭ جۇقتىرعانى انىقتالدى.
بۇل تۋرالى ق ر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ جەدەل شتابى حابارلادى. جەدەل شتاب تاراتقان مالىمەتتەرگە قاراعاندا، 25-ناۋرىزدا Costa Atlantica لاينەرى پروفيلاكتيكا جانە جوندەۋ جۇمىستارىن جۇرگىزۋ ءۇشىن جولاۋشىلارسىز ناگاساكي پورتىنا جەتكىزىلگەن.
لاينەر بارلىق جۇمىستار اياقتالعاننان كەيىن ءساۋىر ايىنىڭ سوڭىندا پورتتان كەتۋى كەرەك ەدى. الايدا، ءساۋىر ايىنىڭ ورتاسىندا ەكيپاج مۇشەلەرىنىڭ بىرىنەن كوروناۆيرۋس ينفەكسياسى تابىلدى. ك ۆ ي تەستىن تاپسىرعان 57 كوماندا مۇشەسىنىڭ 34 ىنىڭ كوروناۆيرۋستى جۇقتىرعانى راستالدى. كەمەدە بارلىعى 623 ادام بار. جاپونيادا COVID-19 انىقتالعان ادامدار سانى 12 مىڭ 255 ادامدى قۇرادى، ونىڭ ىشىندە Diamond Princess كرۋيز كەمەسىندە ۆيرۋستى جۇقتىرعان 712 ادام بار. 296 ادام كوز جۇمدى، 236 ادامنىڭ جاعدايى اۋىر دەپ باعالانىپ وتىر. 2001 ادام ساۋىعىپ شىققان.
