07:56, 27 - ءساۋىر 2023 | GMT +6
جەتىسۋ وبلىسىندا جولعا قويىلعان كامەرا ءۇش ايدا 345 ميلليون تەڭگەنىڭ ايىپپۇلىن تىركەدى
تالدىقورعان. قازاقپارات - جەتىسۋ وبلىسىندا «Vidar» كامەراسى ءۇش ايدا 345 ميلليون تەڭگەنىڭ ايىپپۇلىن تىركەدى، - دەپ حابارلايدى قازاقپارات ءتىلشىسى.
تالدىقورعان قالاسى ماڭىنداعى جانە وبلىس ورتالىعىنداعى 8 بەكەتتەگى 18 بەينەكامەرا جول ەرەجەسىن بۇزعان كولىكتەردى جاپپاي تىركەپ جاتىر.
«بيىلعى جىلدىڭ 1-توقسانىندا جۇرگىزىلگەن تالداۋعا سايكەس «VIDAR» كامەرالارى 14814 زاڭبۇزۋشىلىقتى تىركەدى. وسى بۇزۋشىلىقتارعا جول بەرگەن اۆتوكولىك قۇرالدارىنىڭ جۇرگىزۋشىلەرىنە جالپى سوماسى 345278010 تەڭگەگە ايىپپۇل سالىنىپ، 260 ميلليوننان استامى ءوندىرىلدى»، - دەلىنگەن جەتىسۋ وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.
جەتىسۋ وبلىسىنىڭ پوليتسياسى جۇرگىزۋشىلەرگە اقپاراتتى نازارعا الۋعا جانە قر جول ەرەجەلەرىن قاتاڭ ساقتاۋعا شاقىرادى. قوسىمشا بەكەتتەر جاياۋ جۇرگىنشىلەر وتكەلدەرىندە جانە جولداردىڭ ءقاۋىپتى ۋچاسكەلەرىندە جۇمىس ىستەپ تۇر.