قوستاناي وبلىسىندا 340 گەكتار قاراعايلى ورمان القابىن جىبەك قۇرتى جايپاپ تاستاعان
«بۇل اعاشتاردى كەسىپ الۋ ءۇشىن بىرەۋلەردىڭ قولدان جاساعان جىمىسقى ارەكەتى بولۋى مۇمكىن» دەگەن جورامال دا بار. قازىر ماماندار زيانكەستەن حيميالىق وڭدەۋسىز قۇتىلۋدىڭ جولىن ىزدەستىرىپ جاتىر. قۋراعان ورمان، جاپىراعى كۇزەلگەن اعاش. سارىكول اۋدانىنداعى لەرمونتوۆ ورمان شارۋاشىلىعىنىڭ قازىرگى سيقى وسى. بۇل - جىبەك قۇرتىنىڭ كەلتىرگەن زاردابى. قوماعاي زيانكەستەر ءبىر اي شاماسىندا جاسىل جەلەكتى القاپتىڭ 10 پايىزىن جوق قىلعان.
ۆيتاليي ۆاگنەر، ورمان پاتولوگى، ينجەنەر:
- ولار اسىرەسە كوكتەمدە قاۋىپتى. ءبىر عانا قۇرت 25-30 گرام قاراعاي قىلقانىن جەپ قويادى. ماماندار جۇرگىزگەن زەرتتەۋ ناتيجەسىندە ءبىر اعاشتا 80-100 زيانكەستەن توپتاسقاندىعى انىقتالعان. قۇرتتار كوبەلەككە اينالعاندا ءارقايسىسى 450-گە دەيىن جۇمىرتقا سالادى ەكەن. ەندى ولاردىڭ كوبەيۋىنە جول بەرمەۋ ءۇشىن ورمان شارۋاشىلىعىنىڭ قىزمەتكەرلەرى قۇمىرسقا يلەۋلەرىن قورشاپ، قوسىمشا قۇستار الدىرتقان. «ال حيميالىق وڭدەۋدىڭ ازىرگە قاجەتى جوق»، - دەيدى.
نينا فەدياي، وبلىستىق ورمان شارۋاشىلىعى ءبولىمىنىڭ باسشىسى:
- نەگە دەسەڭىز، بۇل جەردە ەكونوميكالىق زيان كەلتىرۋ شەگىنەن اسقان جوق. ياعني ورماندى قۇرتاتىنداي قۇرت كوبەيىپ كەتتى دەپ ايتا المايمىز. وشاعى بار بولعانىمەن، سونشالىقتى كۇردەلى دەۋگە كەلمەيدى. دەسەك تە بۇل توسىن جاعداي پروكۋراتۋرا قىزمەتكەرلەرىن الاڭداتىپ وتىر.
ايدار بەكنازاروۆ، وبلىستىق پروكۋراتۋرانىڭ باسپا ءسوز قىزمەتىنىڭ وكىلى:
- بۇل ادەيى ىستەلۋى دە مۇمكىن. وسى اعاشتاردى كەسىپ تاستاۋ ءۇشىن.
اتالعان فاكتى بويىنشا پروكۋراتۋرا جاعىنان قوستاناي وبلىستىق ورمان شارۋاشىلىعى ينسپەكتسياسىنا ءتيىستى حات جىبەرىلگەن. الايدا وسى ۋاكىلەتتى ورگان جاعىنان ءتيىستى شارالار قولدانىلماعان جاعدايدا، پروكۋراتۋرا جاعىنان ءتيىستى تەكسەرىس جۇرگىزىلەتىن بولادى.
«ال ورمانشىلار اعاشتى كەسۋ ويىمىزدا دا جوق»، - دەيدى. كەيبىر قۋراعاندار اعاشتار قازىر قايتادان كوكتەپ جاتقان كورىنەدى.
سەرىك سۇلتانوۆ، ورمانشى:
- قۇرتتار ازايىپ جاتىر. ءبىر اعاشتى الساق، 10 قۇرتتان ەكەۋى عانا ءتىرى قالدى. 330 گەكتار كەسىلمەيدى. ورمانشىلاردىڭ ايتۋىنشا، وڭىردە جىبەك قۇرتتارىنىڭ جاپپاي پايدا بولۋى العاش رەت. جانە وعان وتكەن جىلعى قۇرعاقشىلىق تا سەبەپ بولۋى ىقتيمال.
اۆتورى: ابىلاي ماۋدانوۆ
www.24.kz
