بىلتىرعى ون ايدا قازاقستاننىڭ سىرتقى تاۋار اينالىمى %34,1 ءوستى - سەرىك جۇمانعارين
بۇل تۋرالى پرەمەر-مينيستر ءاليحان سمايىلوۆتىڭ توراعالىعىمەن وتكەن ساۋدا جانە ينتەگراتسيا مينيسترلىگىنىڭ كەڭەيتىلگەن القا وتىرىسىندا مينيستر سەرىك جۇمانعارين ءمالىم ەتتى، دەپ حابارلايدى «قازاقپارات» ءتىلشىسى.
«2022-جىلدىڭ 10 ايىنىڭ قورىتىندىسى بويىنشا قازاقستاننىڭ سىرتقى تاۋار اينالىمى 2021-جىلدىڭ سايكەس كەزەڭىمەن سالىستىرعاندا %34,1 ۇلعايىپ، 110,6 ميلليارد دوللار بولدى. ەۋرازيالىق ەكونوميكالىق وداق شەڭبەرىندەگى تاۋار اينالىمى - 23 ميلليارد دوللار. بۇل - 2021-جىلدىڭ ۇقساس كەزەڭىنەن 7,5 پايىزعا ارتىق. سونىمەن قاتار، كەدەندىك اكەلۋ باجدارىنىڭ سومالارىن بولمەۋ مۇمكىندىگى ماقۇلداندى. وسى ارقىلى ۇنەمدەۋ بولجامى - 100 ميلليون دوللاردان استام. ءبىر جىل ىشىندە سەرىكتەس ەلدەر قويعان 6 كەدەرگى جويىلدى، ەكسپورتتىق ءوسىم بولجامى - 500 ميلليون دوللار. بيىل 8 كەدەرگىنى الۋ جوسپارلانىپ وتىر، ولاردىڭ ءوسىم بولجامى - 800 ميلليون دوللار»، - دەدى مينيستر سەرىك جۇمانعارين.
