قازاقستاندا بيىلعى جىلى 34 مىڭ 165 مەملەكەتتىك ءبىلىم گرانتى ءبولىندى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاسيالار قىزمەتىندە كەشەندى تەستىلەۋ قورىتىندىلارىنا بايلانىستى وتكەن بريفينگ بارىسىندا ءبىلىم جانە عىلىم ۆيتسە- ءمينيسترى تاحير بالىقبايەۆ ءمالىم ەتتى.
«جالپى كەشەندى تەستىلەۋ ويداعىداي ءوتتى، ناتيجەسى دە بارلىق كورسەتكىش بويىنشا وتكەن جىلعى دەڭگەيدەن جوعارى. سونىمەن قاتار، كەشە، 23- شىلدەدەن باستاپ 31- شىلدەگە دەيىن قازاقستان جوعارى وقۋ ورىندارىنىڭ ءبىلىم گرانتتارىنا ءوتىنىش قابىلداۋ باستالدى. سوعان وراي، ۇلتتىق ءبىرىڭعاي تەست پەن كەشەندى تەست تاپسىرعان تالاپكەرلەر ءبىلىم گرانتىن الۋعا وزدەرى ءوتىنىش بەرەتىن بولادى» ، - دەدى ت. بالىقبايەۆ.
ەسكە سالا كەتسەك، بيىلعى جىلى مەملەكەتتىك تاپسىرىستىڭ كولەمى 34 مىڭ 165 گرانتتى قۇرايدى. ونىڭ ىشىندە كۇندىزگى وقىتۋ نىسانى بويىنشا 31 مىڭ 135 گرانت بولسا، قىسقاشا وقىتۋ گرانتى - 500, دايىندىق بولىمىنە 2530 گرانت بولىنگەن. وسى گرانتتار 31 - شىلدەگە دەيىن وتىنىشتەرىن تاپسىرعان تالاپكەرلەر اراسىندا رەسپۋبليكالىق كونكۋرس ارقىلى ايقىندالادى.
«بۇگىنگى تاڭدا گرانتتىڭ ەڭ كوپ بولىنگەن باعىتى تەحنيكالىق عىلىمدار - 12 مىڭنان استام. سونىمەن قاتار، گرانتتاعى 5864 ورىن - پەداگوگيكالىق ماماندىقتارعا، 2650 ورىن اۋىل شارۋاشىلىعى جانە ۆەتەريناريا ماماندىقتارىنا ءبولىنىپ وتىر» ، - دەدى ت. بالىقبايەۆ.
اۆتور: قانات مامەتقازى ۇلى
