الماتى وبلىسىنداعى تەرگەۋ جانە ۋاقىتشا ۇستاۋ يزولياتورلارىنان 33 ادام بوساتىلدى
الماتى وبلىسىندا 88 ادام قاماۋدا وتىرسا، 60 نا قوعامنان وقشاۋلاۋمەن بايلانىستى ەمەس باسقا دا بۇلتارتپاۋ شارالارى بەلگىلەندى. بۇلتارتپاۋ شاراسى جەكە باسىن، جاسىن، دەنساۋلىق جاعدايىن، قاتىسۋ دارەجەسىن، ارەكەتكە قاتىناسىن جانە باسقا دا مالىمەتتەردى مۇقيات زەرتتەگەننەن كەيىن تاڭدالدى.
قاڭتار وقيعاسىنىڭ سالدارىنان وبلىس بويىنشا 758 ادام زارداپ شەكتى، ونىڭ ىشىندە 643 ءى پوليتسيا قىزمەتكەرى، 78 ءى اسكەري، 37 ءسى بەيبىت تۇرعىن. كوپشىلىگى جەڭىل جاراقات العان، ولاردىڭ ومىرىنە قاۋىپ ءتونىپ تۇرعان جوق.
«ءىس- ارەكەتتەرىندە اۋىرلاتاتىن ءمان- جايلار جوق ادامدارعا جازانى جەڭىلدەتۋ بولىگىندە مەملەكەت باسشىسىنىڭ تاپسىرماسىن ورىنداۋ ماقساتىندا شارالار قابىلدانۋدا. مۇندا ءاربىر قۇقىق بۇزۋشىعا جەكە ءمان بەرىپ وتىرمىز. سيپاتى مەن ساناتىنىڭ اۋىرلىعى باعالاندى»، - دەدى الماتى وبلىسى پروكۋرورىنىڭ مىندەتىن اتقارۋشى راشيد ءامىروۆ.
ايتا كەتەيىك، قاڭتار وقيعاسى بويىنشا بارلىعى 409 قىلمىستىق ءىس تەرگەلۋدە، ونىڭ 158 ءى ۇرلىق، 191 ءى قارۋدى زاڭسىز ساقتاۋ، 11 ءى تەرروريزم، 3 ءى جاپپاي تارتىپسىزدىك، 3 ءى كىسى ءولتىرۋ جانە تاعى باسقا قىلمىستار. تەرگەۋ ناتيجەلەرى بويىنشا جەڭىلدەتۋ ماقساتىندا 93 اپەللياتسيالىق ءوتىنىشحات ەنگىزىلىپ، سوتپەن پروكۋروردىڭ اكتىلەرى قاناعاتتاندىرىلدى.
71 تۇلعا قاماۋدان بوساتىلدى، 22 نە ايىپپۇل ەسكەرتۋگە اۋىستىرىلدى. قازىرگى تاڭدا وبلىس بويىنشا اكىمشىلىك قاماۋدا وترعان ادامدار جوق. ەستەرىڭىزگە سالامىز، سىبايلاس جەمقورلىققا قارسى قىزمەتىمەن ازاپتاۋ فاكتىلەرىمەن 37 قىلمىستىق ءىس تەرگەلۋدە.
