قازاقستان ىزدەۋ جاريالاعان 33 ادام ت م د اۋماعىندا ۇستالدى - ءى ءى م

نۇر-سۇلتان. قازاقپارات - قازاقستان پوليتسەيلەرى ت م د ەلدەرىندەگى ارىپتەستەرىمەن بىرگە «ىزدەۋ» جەدەل الدىن الۋ شاراسىن وتكىزدى.

بۇل تۋرالى ق ر ءى ءى م رەسمي وكىلى ءنۇردىلدا وراز ايتىپ بەردى، دەپ حابارلايدى قازاقپارات.

«25- قىركۇيەك پەن 1- قازان ارالىعىندا ق ر ىشكى ىستەر مينيسترلىگى ت م د ەلدەرىمەن بىرلەسىپ، «ىزدەۋ» وپەراتسياسىن وتكىزدى جانە ىزدەۋدە جۇرگەن 343 قىلمىسكەر ۇستالدى. ونىڭ ىشىندە كىسى ولتىرگەنى ءۇشىن - 3، دەنساۋلىعىنا اۋىر زيان كەلتىرگەنى ءۇشىن - 7، قاراقشىلىق ءۇشىن - 2 جانە توناۋ ءۇشىن - 3 قىلمىس جاساعاندار بار»، - دەدى ءنۇردىلدا وراز مينيسترلىكتە وتكەن بريفينگتە.

رەسپۋبليكادان تىس جەرلەردە، سونىڭ ىشىندە ت م د ەلدەرىندە قازاقستان ىزدەۋ جاريالاعان 33 ادام ۇستالدى.

«اتاپ ايتقاندا، الماتى پوليتسيا دەپارتامەنتىنىڭ ىزدەۋ تاپسىرماسى بويىنشا ماسكەۋدە قارجى پيراميداسىن قۇرىپ-باسقارعانى ءۇشىن ىزدەستىرىلگەندەر، سونداي-اق اسا ءىرى مولشەردە الاياقتىق جاساعانى ءۇشىن ىزدەستىرىلگەندەر ۇستالعان. رەسەيدىڭ چەليابينسك قالاسىندا قىلمىستىق قاۋىمداستىق قۇرعانى ءۇشىن جانە ونى باسقارعانى ءۇشىن قوستاناي وبلىسىنىڭ پوليتسيا دەپارتامەنتى 2013-جىلدان بەرى ىزدەپ جاتقان كۇدىكتى ۇستالدى. ال چەليابى وبلىسىندا ترانسۇلتتىق ۇيىمداسقان توپ قۇرىپ، ونى باسقارعانى ءۇشىن شىعىس قازاقستان پوليتسياسى ىزدەستىرگەن ادام ۇستالدى»، - دەدى ن. وراز.