قازاقستاننىڭ 33 ازاماتى ساۋد ارابياسىنان ەلگە ورالدى
ازاماتتارىمىزدى شەت ەلدەردەن قايتارۋ جونىندەگى ءىس-شارالار شەڭبەرىندە قازاقستان رەسپۋبليكاسى قورعانىس مينيسترلىگى مەن سىرتقى ىستەر مينيسترلىگىنىڭ، سونداي-اق ساۋد ارابياسىنىڭ مەملەكەتتىك ورگاندارىنىڭ بىرلەسكەن كۇش-جىگەرىمەن 24- ناۋرىزدا وسى ەلدەگى وتانداستارىمىز ەلگە قايتارىلدى.
«قازاقستاننىڭ اسكەري-اۋە كۇشتەرى اسكەري-كولىك اۆياتسياسىنىڭ اتسالىسۋىمەن قازاقستاننىڭ 33 ازاماتى «دجيددا - اقتاۋ» باعىتى بويىنشا امان-ەسەن ۇيىنە ورالدى. بۇل ازاماتتار كورولدىكتىڭ اۋماعىندا بولعان جانە ساۋد بيلىگى COVID-19 تارالۋىنا قارسى شارالار قابىلداۋ اياسىندا شەكتەۋ شارالارىن ەنگىزىپ، حالىقارالىق اۋە، جەر ءۇستى جانە تەڭىز قاتىناستارىنا تولىق تىيىم سالۋ سالدارىنان ەلدەن شىعا الماي قالعان» دەلىنگەن حابارلامادا.
قازىرگى ۋاقىتتا ساۋد ارابياسىنىڭ اۋماعىندا قازاقستان رەسپۋبليكاسىنىڭ 100 گە جۋىق ازاماتى ءوز ەركىمەن قالدى. ولاردىڭ كوپشىلىگى كەلىسىمشارت بويىنشا كورولدىكتىڭ ءتۇرلى قالالارىندا جۇمىس ىستەيدى. ونىڭ ىشىندە تۋريستىك ۆيزامەن كەلگەن جانە مەككە مەن مەدينا قالالارىندا ۋاقىتشا جۇرگەن 11 ادام بار. ەلشىلىك پەن باس كونسۋلدىق اتالعان ازاماتتارمەن تۇراقتى بايلانىستا.
