ءجۇز ناقتى قادام ۇلت جوسپارىنىڭ ءتورتىنشى باعىتى بويىنشا 33 نورماتيۆتىك اكتى قابىلداندى - ە. توعجانوۆ
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا قازاقستان حالقى اسسامبلەياسى ءتوراعاسىنىڭ ورىنباسارى ەرالى توعجانوۆ ءمالىم ەتتى.
ونىڭ ءسوزى بويىنشا، «100 ناقتى قادام» ۇلت جوسپارىنىڭ ءتورتىنشى باعىتى اياسىندا قازىرگى تاڭدا 5 پۋنكت جۇزەگە اسىرىلۋ كەزەڭىندە.
2015 -جىلدىڭ سوڭىندا قازاقستان پرەزيدەنتى ن. ءا. نازاربايەۆ «ماڭگىلىك ەل» جالپىۇلتتىق پاتريوتتىق يدەياسىنىڭ قۇندىلىقتارى نەگىزىندە قازاقستاندىق بىرتەكتىلىك پەن بىرلىكتى نىعايتۋ جانە دامىتۋ تۇجىرىمداماسىن بەكىتتى. قوعامدىق سانانى قايتا قالىپتاستىرۋ جانە بۇكىلقازاقستاندىق مادەنيەتتى نىعايتۋ تۇرعىسىنان جەتەكشى ءرول قازاقستان حالقى اسسامبلەياسىنا بەرىلەدى.
«ۇلت جوسپارى» «100 ناقتى قادام» اياسىندا بىرلىك پەن بىرتەكتىلىكتى قالىپتاستىرۋ ماقساتتارى قويىلعان. ول ماقسات بىرنەشە باعىت بويىنشا دامىتىلادى. بۇگىندە وسى باعىتتا 33 نورماتيۆتىك اكت قابىلداندى. ق ر پارلامەنت دەڭگەيىندە 5 ءىرى زاڭعا قول قويىلدى. مەملەكەت باسشىسىنىڭ 5 جارلىعى مەن ۇكىمەتتىڭ 12 قاۋلىسى قابىلداندى جانە بۇگىندە جۇزەگە اسىرىلۋدا»، - دەپ اتاپ ءوتتى ە. توعجانوۆ.
«بۇل رەفورمالار قازاقستان حالقى اسسامبلەياسى نەگىزىندە ىسكە اسادى. سەبەبى، ەلدىڭ بىرلىگى ءارقاشاندا تاۋەلسىزدىكتىڭ تىرەگى بولىپ قالا بەرەدى. ول - ەل دامۋىنىڭ نەگىزگى قۇندىلىقتارىنىڭ ءبىرى. ەگەر 30 دامىعان ەلدىڭ قاتارىنا ەنۋگە تالپىناتىن بولساق، ەلىمىزدىڭ تۋىن جوعارى كوتەرىپ، ەكونوميكالىق- الەۋمەتتىك سۇراعىن دا شەشەمىز دەيتىن بولساق، الدىمەن قوعامدىق كەلىسىمدى، ەلىمىزدىڭ تۇراقتى دامۋىن تىكەلەي قامتاماسىز ەتۋىمىز كەرەك»، - دەدى ول.
اۆتور: جاسۇلان جولدىبايەۆ
