بىلتىر قازاقستاندىقتار 339 ميلليارد تەڭگە جاردەماقى العان
ونىڭ ىشىندە 199 ميلليارد تەڭگەسى الەۋمەتتىك تولەم رەتىندە وتەلدى، دەپ حابارلايدى قازاقپارات ءتىلشىسى.
«الەۋمەتتىك ساقتاندىرۋ قورى قۇرىلعالى (قور 2005-جىلى قۇرىلدى) 4 تريلليون تەڭگەگە جۋىق قارجى ءتۇستى. قورعا قارجى جۇمىس بەرۋشىلەردىڭ اي سايىنعى اۋدارىمى ەسەبىنەن ءتۇسىپ وتىر. وسى كۇنگە دەيىن جوعارىدا اتالعان سومانىڭ 2,6 تريلليون تەڭگەسى الەۋمەتتىك تولەم رەتىندە جۇمسالدى»، - دەدى مەملەكەتتىك الەۋمەتتىك ساقتاندىرۋ قورى ا ق باس ديرەكتورى نۇرسۇلۋ كەمەل ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سپيكەردىڭ دەرەگىنشە، وتكەن جىلى ەلىمىزدە 339 ميلليارد تەڭگە الەۋمەتتىك تولەم وتەلدى.
«دەگەنمەن بىلتىر بىزگە تۇسكەن قارجى كولەمى 353 ميلليارد تەڭگەنى قۇرادى. ودان بولەك، بىزدە اكتيۆتەر بار. ول - باعاناعى ايتىلعان 4 تريلليون تەڭگەدەن ارتىلعان قارجى. ءبىز اكتيۆتەرگە تيىسپەيمىز، ول - الەۋمەتتىك تولەم الۋشىلارعا بولاشاقتا بەرىلەتىن قورداعى اقشا. الەۋمەتتىك تولەمدى اركىم ءارتۇرلى مەرزىمدە الادى. بىرەۋگە ساناۋلى جىل عانا بەرىلسە، كەلەسى ازامات زەينەتكە شىققانشا الۋى مۇمكىن»، - دەيدى ول.
سونداي-اق، جىل باستالعالى قورعا 204 ميلليارد تەڭگە تۇسكەنى ءمالىم ەتىلدى.
ونىڭ ىشىندە 199 ميلليارد تەڭگەسى الەۋمەتتىك تولەم رەتىندە وتەلدى. ودان بولەك، قور باسشىسى بۇگىندە مىندەتتى الەۋمەتتىك ساقتاندىرۋ جۇيەسىنە شامامەن 6,6 ميلليون جۇمىس ىستەيتىن ازامات قاتىساتىنىن جەتكىزدى.
سول سياقتى ەلىمىزدە 1,1 ميلليوننان استام ادام جىل بويى الەۋمەتتىك تولەم الادى.
