ءۇندىستاندا قۇرعاقشىلىق زاردابىن 330 ميلليون ادام تارتىپ وتىر

استانا. قازاقپارات - ءۇندىستاننىڭ باتىسى سوڭعى 40 جىلدان بەرى قۇرعاقشىلىق قۇرساۋىنان شىعا الماي كەلەدى، www.24.kz.

وسىنىڭ كەسىرىنەن 330 ميلليوننان استام ادام زارداپ شەگىپ وتىر. بارىنەن دە قانت قىزىلشاسى مەن ماقتا وسىرەتىن شارۋالار تىعىرىققا تىرەلگەن. جۇتتان قىرىلىپ جاتقان مال سانىندا ەسەپ جوق. ونىڭ ۇستىنە، ەڭبەككە قابىلەتتى جاستار قارتتار مەن بالالاردى اۋىلداردا جالعىز قالدىرىپ، كۇنكورىس ءۇشىن وزگە وڭىرلەرگە كەتۋگە ءماجبۇر.

جەرگىلىكتى پوليتسيا ءبىر جىلدىڭ ىشىندە مىڭنان استام ادامنىڭ ءوز-وزىنە قول جۇمساعانىن راستادى. ءۇندى بيلىگى ايماققا تۇراقتى قاتىناپ، ءار 8 كۇن سايىن اۋىز سۋ جەتكىزەتىن ارنايى پويىز جۇرگىزسە دە، احۋال ءالى كۇنگە دەيىن جاقسارماي وتىر. سينوپتيكتەر الداعى 2 ايدا تەمپەراتۋرا باعانى 40 گرادۋسقا دەيىن كوتەرىلەدى دەپ بولجايدى.