18:37, 31 - جەلتوقسان 2014 | GMT +5
قىتاي سوتى ءولىم جازاسىنا كەسىلگەن سوڭ اقتالعان ەر ادامنىڭ وتباسىنا 330 مىڭ دوللار تولەيدى
استانا. قازاقپارات - ق ح ر-دىڭ سولتۇستىگىندەگى ىشكى موڭعوليا اۆتونومدىق وكرۋگىنىڭ سوتى جاساماعان قىلمىسى ءۇشىن 18 جىل بۇرىن ءولىم جازاسىنا كەسىلىپ، جەلتوقساننىڭ ورتاسىندا اقتالعان ەر ادامنىڭ وتباسىنا وتەماقى رەتىندە 330 مىڭ دوللار تولەيدى.
ىشكى موڭعوليا سوتى 15 - جەلتوقساندا حۋۋگجيلت (Huugjilt) ەسىمدى ەر ادامدى اقتاپ شىعىپ، اتا-اناسىنان كەشىرىم سۇرادى.
1996 - جىلدىڭ ءساۋىر ايىندا تانىسىمەن بىرگە جۇرگەن حۋۋگجيلت حۋح-حوتو قالاسىنداعى قوعامدىق دارەتحانالاردىڭ بىرىنەن ايەل ادامنىڭ مۇردەسىن تاۋىپ، بۇل تۋرالى پوليتسياعا حابارلاعان.
سول جىلدىڭ مامىرىندا سوت ول كەزدە 18 جاستاعى جىگىتتى ادام ءولتىردى دەپ ايىپتاعان. جاس ازامات ءولىم جازاسىنا كەسىلدى، سوت ۇكىمى 1996 - جىلدىڭ ماۋسىمىندا ورىندالدى. 2005 - جىلى ءتارتىپ ساقشىلارى بۇل ايەلدى ولتىرگەنىن مويىنداعان ەر ادامدى ۇستاعان. 2014 - جىلدىڭ قاراشا ايىندا سوت حۋۋگجيلتتىڭ ءىسىن قايتا قاراۋعا كىرىستى.
