استاناداعى كوپسالالى اۋرۋحانا بۋحگالتەرى 32 ميلليون تەڭگەنى جىمقىرعانى ءۇشىن سوتتالدى
قالالىق سوتتىڭ رەسمي سايتىنداعى مالىمەتتە ۇكىمگە نەگىز بولعان قىلمىستىق ارەكەتتى «سەنىپ تاپسىرىلعان مۇلىكتى يەمدەنۋ جانە ءراسۋا ەتۋ» (قىلمىستىق كودەكستىڭ 189-بابى، 4-بولىگىنىڭ، 2 -تارماعى) دەپ سيپاتتايدى. سونداي- اق، مۇنداي قىلمىستىڭ «جەمقورلىق» ساناتىنا جاتپايتىنى ايتىلعان.
سوتتالۋشىعا 01.01. 2021 ج. - 29.11.2022 ج. ارالىعىندا قىزمەت بابىن پايدالانىپ، سەنىپ تاپسىرىلعان مۇلىكتى يەمدەنۋ جانە ءراسۋا ەتۋ ارقىلى كاسىپورىننىڭ 32 ميلليون تەڭگەسىن جىمقىردى دەگەن ايىپ تاعىلعان.
سۋديا زارداپ شەككەن تاراپ وكىلى مەن اۋديتورلىق ەسەپتىڭ، كىرىس- كاسسالىق وردەردىڭ كەلتىرگەن مالىمەتتەرى كۇدىكتىنىڭ كىناسىن دالەلدەيدى دەگەن شەشىم قابىلدادى.
دەگەنمەن، بۋحگالتەردىڭ ءوز كىناسىن مويىنداعانىن، جاساعان ارەكەتىنە وكىنەتىنىن، كەلگەن شىعىندى تولىق كولەمدە جانە ەركىمەن قايتارعانىن، جاسى 27-دە عانا بولۋىن، قىلمىستىق جاۋاپقا العاش رەت تارتىلىپ وتىرعانىن ەسكەرىپ، جازاسىن جەڭىلدەتتى.
«سوت ۇكىمىمەن ا. قىلمىستىق كودەكستىڭ 189-بابى، 4-بولىگىنىڭ 2-تارماعىندا كورسەتىلگەن قىلمىستى جاساعانى ءۇشىن كىنالى دەپ تانىلىپ، 7 جىل باس بوستاندىعىنان ايىرىلدى. ماتەريالدىق جاۋاپكەرشىلىك جۇكتەيتىن قىزمەتپەن اينالىسۋ قۇقىعىنا 10 جىل شەكتەۋ قويىلادى.
قىلمىستىق كودەكستىڭ 63-بابى بويىنشا جازا شارتتى تۇردە تاعايىندالدى. سوتتالۋشى ۇكىم مەرزىمىنىڭ ءون بويىندا پروباتسيالىق قاداعالاۋدا بولادى. ۇكىم ءالى كۇشىنە ەنگەن جوق»، - دەلىنگەن قالالىق سوتتىڭ رەسمي سايتىندا.
اۆتور:
ەسىمجان ناقتىباي