ەلىمىزدە 32 رەسەيلىك الاياققا قاتىستى قىلمىس تەرگەلۋدە – ءى ءى م

نۇر- سۇلتان. قازاقپارات – ق ر ءى ءى م قىلمىستىق پوليتسيا دەپارتامەنتىنىڭ كيبەرقىلمىسقا قارسى كۇرەس ورتالىعى باستىعىنىڭ ورىنباسارى رۇستەم دۇيسەتايەۆ ينتەرنەتتەگى الاياقتار تۋرالى ايتتى، دەپ حابارلايدى قازاقپارات ءتىلشىسى.

«الاياق ساتىپ الۋشىلار جاريالانعان جارنامالاردى كورىپ، يەلەرىنە حابارلاسادى. اڭگىمە بارىسىندا «ساتىپ الۋشى» تاۋاردى الاتىنىن ايتىپ، «ەشكىمگە ساتپا» دەپ الداپ، الدىن الا اقشانىڭ ءبىر بولىگىن جىبەرەتىنىن ايتىپ سەندىرەدى. اقشانى اۋدارىپ جىبەرۋ ءۇشىن پلاستيك كارتانىڭ ءنومىرىن جىبەرۋدى وتىنەدى. ءبىراز ۋاقىت وتكەننەن كەيىن تاۋار يەسىنە قايتا قوڭىراۋ شالىپ، اقشانى اۋدارۋ ءۇشىن تەلەفونعا س م س كۇيىندە كەلگەن كودتى جىبەرۋدى سۇرايدى. باسقا جاعدايدا بانكوماتقا كەلىپ، تاۋار يەسىنە قانداي وپەراتسيالاردى جۇرگىزۋ كەرەكتىگىن تۇسىندىرەدى»، - دەيدى ول ءى ءى م- دە وتكەن باسپا ءسوز ءماسليحاتىندا.

وسىلايشا، س م س ارقىلى كەلگەن كودتى بىلگەننەن كەيىن الاياق ينتەرنەت- بانكينگكە قوسىلۋ امالىن ءبىلىپ الادى.

«ماسەلەن، قوستاناي وبلىسىندا وسىنداي الاياقتىققا قاتىستى 32 ءىس قارالىپ جاتىر. سول قىلمىستىڭ ءبارى رەسەي اۋماعىنان جاسالعان. ازاماتتاردىڭ شوتتارىنان الداپ شىعارىلعان سوما ءۇشىنشى ادامنىڭ شوتىنا ءتۇسىپ وتىرعان. رەسەيلىك ارىپتەستەرمەن بىرگە قاجەتتى شارالاردى ىسكە اسىرىپ جاتىرمىز»، - دەدى ءى ءى م وكىلى.

سونىمەن قاتار، رۇستەم دۇيسەتايەۆ كەيبىر ازاماتتارعا «بانكتىڭ وكىلىمىز» دەپ حابارلاسىپ، تۇزاققا ءتۇسىرىپ جاتادى.

«كەيبىر اككىلەرى ءتىپتى كارتوچكانىڭ شوتى ارقىلى زارداپ شەككەندەردىڭ دەپوزيتىن «تازارتىپ» كەتەدى»، - دەيدى ول.

اۆتور: ايان بەكەن ۇلى