ىستامبۇل اۋەجايىنا شابۋىل جاسالىپ، 32 ادام قازا تاپتى
تۇركيا پرەزيدەنتى رەدجەپ تايپ ەردوعان مۇنى تەراكت دەپ اتاپ، قاسيەتتى رامازان ايىندا بەيكۇنا ادامداردى ولتىرگەن قاسكويلەردىڭ ءىس-ارەكەتىن سىنعا الدى. ەردوعان حالىقارالىق قوعامداستىقتى تەرروريزممەن كۇرەسۋدى كۇشەيتۋگە شاقىردى.
سەيسەنبى كۇنى كەشكە ىستامبۇلدا اتاتۇرىك اتىنداعى حالىقارالىق اۋەجايدا جارىلىستار مەن اتىستار بولدى.
تۇركيانىڭ ادىلەت ءمينسترى بەكير بوزداگتىڭ سوزىنە قاراعاندا، مۇنى ءۇش جانكەشتى جاساعان.
شابۋىلشىلاردىڭ ءبىرى كالاشنيكوۆ اۆتوماتىمەن كۇزەتشىلەرگە وق جاۋدىردى، دەدى بوزداگ.
وزگە مالىمەتتەرگە قاراعاندا، شابۋىلشىلار اۆتوماتتارمەن وق جاۋدىرىپ، كەيىن ءوز ءوزىن جارعان.
كۋاگەرلەردىڭ سوزىنە قاراعاندا، قاسكويلەردىڭ ءبىرى اۋەجايدىڭ كىرەبەرىسىندە ورنالاسقان مەتالل ىزدەيتىن جابدىقتىڭ قاسىندا شوعىرلانعان ادامداردىڭ اراسىندا تۇرىپ جارىلعىش زاتىن ىسكە قوسقان.
جارىلىستان كەيىن ىستامبۇل حالىقارالىق اۋەجايىنان ۇشىرىلادى دەپ جوسپارلانعان بارلىق رەيستەر كەيىنگە شەگەرىلدى. جولاۋشىلاردى قوناق ۇيلەرگە جايعاستىرىپ جاتىر.
ازىرگە بۇل قىلمىستى ەشكىم موينىنا المادى.
وتكەن جىلى اتاتۇرىك اۋەجايى كەلۋشىلەردىڭ سانى بويىنشا ەۋروپادا ءۇش ۇزدىككە ەنگەن.
2015-جىلى ونىڭ قىزمەتىن 61 ميلليوننان استام ادام پايدالاندى.