سوعىستا جۇرەك تۇسىنا قادالعان وقپەن 32 جىلداي ءومىر سۇرگەن
جەڭىس كۇنى، بۇل - ۇلى مەرەكە. ۇلى وتان سوعىسى جىلدارىندا ءبىزدىڭ ەلىمىزدىڭ ۇل- قىزدارى دا جاۋمەن ايانباي شايقاستى.
سوعىسقا 2 ميلليونعا جۋىق قازاقستاندىق قاتىسىپ، ولاردىڭ جارتىسى مايدان دالاسىنان ورالمادى. ميلليونعا جۋىق ادام تىلدا ەڭبەك ەتىپ، جەڭىستى جاقىنداتۋعا لايىقتى ۇلەس قوستى. مايدانگەرلەر قاتارى جىل سايىن سيرەپ بارادى. سوندىقتان، ولاردى قۇرمەتتەپ، ارداقتاۋ - اسىل پارىز.
ەل ءۇشىن ەرلىك جاساپ، وتانسۇيگىشتىك پەن پاتريوتتىقتىڭ ۇلگىسىن كورسەتكەن قاھارماندار ەشقاشان دا ۇمىتىلمايدى. ونىڭ ىشىندە بارشامىزدىڭ اتا- بابامىز دا وسى سوعىسقا ايانباي تەر توكتى، ءبىرى مايدان دالاسىندا جاۋمەن كۇرەسسە، ءبىرى تىلدا ەڭبەك ەتىپ، ۇلى جەڭىستى جاقىنداتۋعا اتسالىستى.
سولاردىڭ ءبىرى بۇگىندە قىزىلوردا وبلىسىنداعى توتەنشە جاعدايلار دەپارتامەنتىنىڭ كومەندانتى گۇلجاھان بورانوۆانىڭ اكەسى - تۇرسىنباي اكەي بولاتىن. بۇگىندە اتاي مارقۇم بولىپ كەتسە دە، بالالارىنىڭ جۇرەگىندە اكە بەينەسى ساقتالىپ، ونىڭ سوعىستاعى ەرلىگى، باتىرلىعى، پاراساتتىلىعى ەل اۋزىندا ۇمىتىلماستاي بولىپ قالدى.
1924 -جىلى دۇنيەگە كەلگەن بورانوۆ تۇرسىنباي ساۋلەنباي ۇلى قىزىلوردا قالاسىندا 8 جىلدىق مەكتەپتى ءتامامداعان سوڭ 1942 -جىلى 18 جاسىندا ءوزى سۇرانىپ ۇلى وتان سوعىسىنا اتتانعان. رۋى - بوجبان قوڭىرات ەدى. اكەسى - بوران ۇلى ساۋلەنباي مەن اناسى - ءبيبىاجار قاراپايىم ەڭبەك ادامدارى بولدى.
وتباسىندا ەكى ءىنىسى - داۋىلبەك پەن قابىلبايلارعا اعا رەتىندە قامقور بولا ءبىلدى. مايدانعا بارعان جاس جىگىت - تۇرسىنبايدى 6 اي وقىتىپ، «لەيتەنانت» دەگەن اسكەري اتاق بەرگەن. وسى اسكەري شەندى يەلەنگەن سوڭ اسكەري روتانى باسقارىپ، جاۋ شەبىنە قارسى سوعىستىڭ ورتىنە توتەپ بەرگەن.
قان مايداندا 1943 -جىلى تاماعىنان وق ءتيىپ، جۇرەكتىڭ سىرتقى قابىعىن جارالاعان. وسى كەزدە اسكەري گوسپيتالعا جاتىپ ەم العان. وقتى سول كەزدىڭ اسكەري گوسپيتال دارىگەرلەرى قاتىرىپ تاستاپ، وسى جاراقاتىمەن ەلگە كەلگەن ول كەشەگى 1975 -جىلعا دەيىن ءومىر سۇرگەن.
دالىرەك ايتقاندا 1973 -جىلى الماتىداعى اسكەري گوسپيتالعا بارىپ، ەمدەلىپ، وقتى ماگنيتتىك ادىسپەن الماقشى بولادى، الايدا، وقتىڭ ورنىن قوزعاپ جىبەرگەندىكتەن، كەيىن وسى جاراقاتىنان 1975 -جىلى دۇنيە سالادى.
1951 -جىلى ەلگە كەلىپ، قونىسوۆا اقتاي بەكتۇرعان قىزىنا ۇيلەنەدى. ودان 4 بالا دۇنيەگە كەلگەن. 1953 -جىلى اباي، 1956 -جىلى گۇلشات، 1958 -جىلى گۇلجاھان، 1961 -جىلى دۇيسەنباي. قازىرگى كۇنى يگور، گۇلجان، ەرلان گۇلجانات، ايدا، رۋسلان، باقتان، نۇرلىبەك، گۇلىماي، اسەلىم، ايانا، اكەجان اتتى نەمەرەلەر مەن جيەندەرى اتا ەرلىگىن ماقتان ەتەدى. تۇرسىنباي اكەيدىڭ نەمەرەسى يگور دا بۇگىندە ءورت ءسوندىرۋ سالاسىنىڭ مامانى رەتىندە اسكەري قىزمەتتە.
ول ءوسىپ كەلە جاتقان بالالارى - ءدىنيسلام مەن اديناعا سوعىسقا قاتىسقان جاۋجۇرەك اتاسى تۋرالى ماقتانىشپەن ايتۋدان ەش جالىققان ەمەس. «بورانوۆتار اۋلەتى جىل سايىن 9 -مامىر - جەڭىس كۇنىندە اتا ءارۋاعىنا قۇران باعىشتاپ، ەسكە الىپ، كەيىنگى ۇرپاقتارىنا ۇلگى قىلىپ كەلەدى. بيىل دا سول ءداستۇر جالعاستىعىن تابادى»، - دەيدى اتايدىڭ قىزى، ارىپتەسىمىز گۇلجاھان تۇرسىنباي قىزى.
ايگۇل نۇرمانوۆا، قىزىلوردا وبلىسى ت ج د مەملەكەتتىك ءتىل جانە اقپارات توبىنىڭ باس مامانى
