قازاقستان ەر مەن ايەل تەڭدىگى رەيتينگىسىندە 32-ورىندا تۇر

كەشە اقوردادا ەلىمىزدىڭ مەملەكەتتىك حاتشىسىمەن كەزدەسكەن «ب ۇ ۇ- ايەلدەر» ۇيىمىنىڭ قازاقستانداعى وكىلى يلەين كونكيەۆيچ وسىنداي دەرەكتەردى تىلگە تيەك ەتتى.

ونىڭ ايتۋىنشا، ەلىمىزدە گەندەرلىك ساياسات وزگە ازيا ەلدەرىمەن سالىستىرعاندا كوش ىلگەرى. ال مەملەكەتتىك حاتشى ءوز تاراپىنان «نۇرلى جول» جاڭا ەكونوميكالىق ساياساتىن جۇزەگە اسىرۋ بارىسىندا بارلىق ينفراقۇرىلىمدى جوبالارعا ايەلدەردى بەلسەندى تارتۋ ماقساتىندا جۇيەلى جۇمىس اتقارىلاتىنىن اتاپ ءوتتى.

تاراپتار ايەلدەر كاسىپكەرلىگىنە قولداۋ كورسەتۋ، انا مەن بالانى قورعاۋ، تۇرمىستىق زورلىق-زومبىلىقتىڭ الدىن الۋ ماسەلەلەرىن، ودان ءارى ىنتىماقتاستىق ورناتۋ جانە دامۋ كەلەشەگىن تالقىلادى.

ەلەنا تاراسەنكو، ق ر پارلامەنتى ءماجىلىسىنىڭ دەپۋتاتى، ايەلدەر ىستەرى جانە وتباسى- دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى:

- بۇگىنگى تاڭدا ۇلتتىق كوميسسيانىڭ جۇمىس جوسپارى بەكىتىلدى. ەڭ الدىمەن بۇل ايماقتارعا ءجىتى كوڭىل ءبولۋ كەرەك. وڭىردەگى ايەلدەردىڭ ساياسات پەن ەكونوميكا، جەرگىلىكتى اتقارۋشى ورگاندارداعى ۇلەسىن ارتتىرۋ قاجەت. بۇل ماسەلەلەر اتقارىلعان شارالار ناتيجەسىندە شەشىمىن تاۋىپ جاتىر.

www.24.kz