پاۆلوداردا ءبىر كۇندە 327 ساياجاي ۋچاسكەسى ورتەنىپ كەتتى - ۆيدەو

نۇر-سۇلتان. قازاقپارات - پاۆلوداردا بۇتىندەي ءبىر باۋ-باقشا ۇجىمى ورتەنىپ كەتتى.
None
None

الپىس گەكتار اۋماقتى شارپىعان قىزىل جالىننان 327 ساياجاي ۋچاسكەسى كۇلگە اينالدى. ءورت سوندىرۋشىلەر وقيعا ورنىنان زەينەتكەردىڭ دەنەسىن الىپ شىقتى. بيىلعى ساياجاي ماۋسىمى پاۆلودارلىق باعباندار ءۇشىن جايسىز وقيعامەن باستالدى. وتكەن اپتانىڭ سوڭىندا تۇتانعان ءورت ىرىق بەرمەدى. قاتتى جەل جاعدايدى ۋشىقتىرىپ جىبەردى. ۆلاديمير پچەلكين قىزىل جالىن شارپىعان اۋماقتى تازارتىپ جاتىر. ونىڭ جەرى جارتىلاي جانىپ كەتكەن.

«مەن ءورتتىڭ قاي جاقتان كەلگەنىن بارىپ كورىپ كەلدىم. ول جاقتاعى ساياجايلاردىڭ تۇگى قالماي ورتەنىپ كەتكەن»، دەيدى قالا تۇرعىنى ۆلاديمير پچەلكين.

ءورت ءسوندىرۋ جۇمىستارى ءبىر تاۋلىككە سوزىلدى. قۇتقارۋشىلار قايعىلى جاعدايعا تاپ بولعاندارىن ايتادى. ساياجاي ۇلەرىنىڭ بىرىندە گاز باللونى جارىلىپ، ءبىر ادام كوز جۇمعان. زەينەتكەردىڭ دەنەسى تۇنگى ساعات 3-تەر شاماسىندا تابىلدى. وزگە ادامدار زارداپ شەكپەگەن.

«ءورتتىڭ وشاعى ءبىر جەردەن باستالدى. ءارى قالاي جالىندى جەل ايداپ اكەتتى. وسىنىڭ كەسىرىنەن بىزدە 3 ساياجاي اۋماعى وتقا وراندى. ۇيلەردىڭ شاتىرلارى جانىپ، لاۋلاعان وت قاس قاعىم ساتتە باسقا اۋماقتارعا تاراپ كەتتى. ءورتتىڭ بەتىن قايتارۋعا قاتتى سوققان جەل كەدەرگى كەلتىردى»، دەيدى وبلىستىق توتەنشە جاعدايلار دەپارتامەنتى باسشىسىنىڭ ورىنباسارى قايرات شايماردەنوۆ.

ازىرگە ءورتتىڭ ناقتى سەبەبى انىقتالعان جوق. ماماندار وتتىڭ قاساقانا قويىلۋىن جوققا شىعارمايدى. تۇرعىنداردىڭ سالعىرتتىعى دا وسىنداي كۇيگە جەتكىزۋى مۇمكىن. ونىڭ ءبارى تەرگەۋ امالدارى بارىسىندا بەلگىلى بولادى. اينالاسى بىرنەشە كۇن ىشىندە ءۇش باۋ- باقشا ۇجىمىندا 478 ساياجاي ءۇيى مەن شارۋاشىلىق نىساندارى ورتەنىپ كەتتى. جالپى كولەمى 180 گەكتار جەر كۇلگە اينالدى.

«ساياجاي شارۋاشىلىعىنىڭ ءتوراعالارىنا قاتىستى حاتتاما تولتىرىلدى. بۇل جۇمىستى ءبىز ساياجاي ۇيىمدارىن قورعاۋ ماقساتىندا جۇرگىزەتىن بولامىز. كۇن سايىن ينجەنەرلىك- ينسپەكتورلىق قۇراممەن رەيدتەر ۇيىمداستىرىلىپ، ءورتتىڭ الدىن الۋ شارالارى تۇسىندىرىلەدى»، دەيدى وبلىستىق توتەنشە جاعدايلار دەپارتامەنتىنىڭ باسقارما باسشىسى سەرگەي وگاي.

ءتىلسىز جاۋعا قارسى كۇرەس جىل بويى جالعاسادى. قوقىستاردى اشىق الاڭداردا ورتەۋگە تىيىم سالىنعان. الايدا تۇرعىندار قاراپايىم قاۋىپسىزدىك ەرەجەلەرىن قاپەرگە المايدى. سوڭعى كۇندەرى ساياجاي اۋماقتارىندا 7 ءىرى ءورت تىركەلدى.

بۇل تۋرالى «حابار 24» حابارلاعان بولاتىن.



سوڭعى جاڭالىقتار