كوكشەتاۋدا ءبىر مەزەتتە 3200 دەن استام ادام «قارا جورعا» ءبيىن بيلەدى
تاۋدىڭ باسىنا جينالعان قالاداعى كاسىپورىن جۇمىسشىلارى مەن ستۋدەنتتەر، مەكتەپ وقۋشىلارى اينالاسى 20 مينۋت بويى «قارا جورعا» ءبيىن بيلەدى. كاسىپورىن جۇمىسشىلارى ارنايى جۇمىس كيىمىن كيىپ شىقسا، شىعارماشىلىق ۇجىمدار ۇلتتىق كيىممەن بيلەدى. «اكسيانىڭ ماقساتى - ەرەسەكتەر مەن ءوسىپ كەلە جاتقان كەلەشەك جاستارعا ەستەتيكالىق تاربيە بەرىپ، حورەگرافيالىق شىعارماشىلىعىن ارتتىرۋ. اكسيا ارقىلى حالىقتىڭ «قارا جورعا» ۇلتتىق بيىنە كوڭىلىن اۋدارۋ. وعان قوسا، ەسترادا جانە حالىقتىق ءبيدى ناسيحاتتاۋ» ، دەپ ءتۇسىندىردى كوكشەتاۋ قالالىق مادەنيەت جانە تىلدەردى دامىتۋ ءبولىمىنىڭ باسشىسى ايگۇل ءسابيتوۆا.
ونىڭ سوزىنشە، «قارا جورعا بيلەيىك!» اكسياسى مەملەكەت باسشىسى ن. نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى مىندەتتەردى جۇزەگە اسىرۋ اياسىندا قولعا الىنىپ وتىر. الداعى ۋاقىتتا وڭىرلىك ايتىس ۇيىمداستىرۋ جوسپارلانعان.
