ەلىمىزدە قازاقستان اتتى 32، ەلباسى ەسىمدى 67 ادام تۇرادى - ستاتيستيكا
ال، قازاقستان، استانا نەمەسە ەلباسى دەگەن تۇرعىنداردىڭ بارى تۋرالى ەستىگىن بە ەدىڭىز؟
ۇلتتىق ستاتيستيكا بيۋروسى وسىنداي ەرەكشە ەسىمدەر تۋرالى مالىمەت جاريالادى، دەپ حابارلايدى قازاقپارات.
اتاپ ايتقاندا، قازاقستان ەسىمى 32 ادامعا بەرىلگەن. سونداي-اق، ەلىمىزدە 86 تەڭگە، 26 استانا، 67 ەلباسى بار.
ءبىر ادامنىڭ اتى تاۋەلسىزدىك بولسا، تاعى 1 ادامنىڭ ەسىمى - اتازاڭ جانە 1 قىزدىڭ اتى - ارۋ-استانا. ال، 44387 اتا-انا بالاسىنىڭ اتىن نۇرسۇلتان دەپ قويعان.
سونداي-اق، احمەت باتۇرسىنوۆ پەن ساكەن سەيفۋللين – 11، ماعجان جۇمابايەۆ - 105 جانە ءىلياس جانسۇگىروۆ 1 رەت كەزدەسەدى.
ستاتيستيكا بيۋروسىنىڭ اقپاراتىنا سايكەس، ءتاڭىر-جومارت، نۇرپاتشايىم، احمەت بايتۇرسىن، اق-تىلەك، سۇيكىمدى، تاڭعاجايىپ، ءتاتتىم، سۋلتان بەيبارىس، سۇلۋبيكە سياقتى ەرەكشە ەسىمگە يە قازاقستاندىقتار بار.
مۇنداي ەسىمدەر ازىرگە ءبىر رەتتەن عانا قويىلعان.
ەسكە سالا كەتسەك، بيىلعى ورازا ايىندا ەلىمىزدە رامازان ەسىمدى 1085 ۇل دۇنيەگە كەلدى.
