تۇركىستان وبلىسىندا كيبەرقىلمىسقا قارسى كۇرەس قىزمەتكەرلەرى 31 الاياقتى ۇستادى
ق ر ءى ءى م «CyberPol» پيلوتتىق جوباسىن ىسكە قوسقان بولاتىن. بۇل جوبا سيفرلىق تەحنولوگيالار ارقىلى جاسالاتىن زاڭسىزدىقپەن كۇرەسۋ، مەملەكەتتىك ورگاندارمەن ءوزارا ءىس- قيمىل جاساۋ، ەل تۇرعىندارىنىڭ قۇقىقتىق ساۋاتتىلىعىن ارتتىرۋدى كوزدەيدى. وسى باعىتتا تۇركىستان وبلىسى پ د كريمينالدىق پوليتسيا باسقارماسىندا كيبەرقىلمىس پەن ينتەرنەت- الاياقتىقتىڭ الدىن الىپ، انىقتاۋدا 6 جەدەل ۋاكىل، 3 تەرگەۋشىدەن قۇرىلعان «كيبەرقىلمىسقا قارسى كۇرەس» تۇراقتى توبى قارقىندى جۇمىس جۇرگىزىپ جاتىر.
دەپارتامەنت باستىعىنىڭ تاپسىرماسىمەن قۇرىلعان توپ ينتەرنەت- الاياقتىق قىلمىسىمەن اينالىسقان جالپى 31 تۇرعىندى ۇستاپ، ولاردىڭ 56 دەرەك ينتەرنەت- الاياقتىق قىلمىسىنا قاتىسى بارىن دالەلدەگەن. بۇل قىلمىستىق ىستەر بويىنشا جيناقتالعان ءىس قۇجاتتار سوتقا جولدانعان. ماسەلەن، بۇل توپتىڭ جەدەل ۋاكىلدەرى وبلىستىڭ بىرنەشە تۇرعىنىن الداپ، ولاردىڭ اتىنان ونلاين نەسيە العان جاس جىگىتتى ۇستادى.
ناقتىراق ايتساق، تۇركىستان قالالىق پوليتسيا باسقارماسىنا جەرگىلىكتى تۇرعىن ارىزداندى. ول كولىگىنە جولاۋشى بولىپ وتىرعان جاس جىگىت اڭگىمەگە تارتىپ، سەنىمىنە كىرىپ، تەلەفونىن سۇراپ الىپ، ونداعى بانك قوسىمشاسىن پايدالانىپ، ونىڭ اتىنا 1,6 ميلليون تەڭگە نەسيە راسىمدەپ العانىن جەتكىزدى. اقپارات الىسىمەن ارنايى قۇرىلعان توپ قىزمەتكەرلەرى كۇدىكتىنىڭ جەكە باسىن انىقتادى.
كۇدىكتى - سارىاعاش اۋدانىنىڭ تۇرعىنى، جۇمىسسىز جاس جىگىت. ول 6 بىردەي جۇرگىزۋشىنى الداپ، ولارعا جالپى 6 ميلليون تەڭگەگە جۋىق ماتەريالدىق شىعىن كەلتىرگەنى بەلگىلى بولدى.
نەسيەگە ماقۇلداۋ العان الاياق، تانىسى اقشا سالىپ جىبەرگەنىن ايتىپ، جۇرگىزۋشىنىڭ تەلەفونى ارقىلى ارنايى تەرمينالداردان قاراجاتتى شەشىپ الىپ وتىرعان. قازىرگى تاڭدا كۇدىكتى قاماۋدا، وعان قاتىستى ماتەريالدار ايىپتاۋ اكتىسىمەن سوتقا جولداندى.
ايتا كەتسەك، كيبەرقىلمىسقا قارسى كۇرەس قىزمەتكەرلەرى ورىن العان ينتەرنەت- الاياقتىق قىلمىستارىن سارالاپ، جەرگىلىكتى حالىقتىڭ قارجىلىق ساۋاتتىلىعىن ارتتىرۋ ماقساتىندا جۇيەلى پروفيلاكتيكالىق ءىس- شارالاردى ۇنەمى ۇيىمداستىرىپ كەلەدى.
مىسالى، بۇل توپپەن 18-20-ءساۋىر كۇندەرى ارالىعىندا اقپاراتتىق تەحنولوگيالاردى پايدالانا وتىرىپ جاسالاتىن قۇقىق بۇزۋشىلىقتارعا، ونىڭ ىشىندە ينتەرنەت- الاياقتىققا قارسى كۇرەس تيىمدىلىگىن ارتتىرۋعا باعىتتالعان «Anti-Fraud» جەدەل- پروفيلاكتيكالىق ءىس- شاراسى ءوتىپ جاتىر.
