قاڭتار وقيعاسى: راقىمشىلىققا ىلىككەن 31 ادام تۇرمەدەن بوساپ شىقتى

«وسى جىلدىڭ 3-قاراشاسىندا قاڭتار وقيعاسى كەزىندە قىلمىستىق قۇقىق بۇزۋشىلىق جاساعان تۇلعالارعا قاتىستى «راقىمشىلىق تۋرالى» ق ر زاڭىنىڭ ەرەجەلەرى كۇشىنە ەندى. قازىرگى ۋاقىتتا راقىمشىلىق 1089 تۇلعاعا قاتىستى قولدانىلدى. ونىڭ ىشىندە ورتاشا اۋىرلىقتاعى قىلمىس جاساعان 8 كۇدىكتىگە قاتىستى قىلمىستىق قۋدالاۋ تەرگەۋ ساتىسىندا تۇر. سوتتار 9 تۇلعاعا قاتىستى قىلمىستىق ءىستى توقتاتىپ، 981 سوتتالۋشىنىڭ جازا مەرزىمىن قىسقارتتى. زاڭ قولدانىسقا ەنگەن ساتتەن بەرى تۇرمەدەن راقىمشىلىق اكتىسىن قولدانۋ ارقىلى 31 تۇلعا بوساپ شىقتى»، - دەلىنگەن باس پروكۋراتۋرانىڭ قازاقپارات ساۋالىنا بەرگەن جاۋابىندا.

بۇعان دەيىن قاڭتار وقيعاسىنا قاتىسقان 1 مىڭنان استام ادامعا راقىمشىلىق جاسالعانى تۋرالى حابارلاعان بولاتىنبىز.