وزبەكستان تاۋەلسىزدىگىنىڭ 31 جىلدىعىن اتاپ ءوتتى
بيىل رەسپۋبليكا تاۋەلسىزدىكتىڭ 31 جىلدىعىن اتاپ ءوتتى، دەپ حابارلايدى قازاقپارات مەنشىكتى ءتىلشىسى.
وزبەكستان پرەزيدەنتى شاۆكات ميرزيەيەۆتىڭ قاتىسۋىمەن مەرەكەلىك ءىس-شارا بىلتىر رەسپۋبليكانىڭ مەرەيتويىنا ارنايى سالىنعان «جاڭا وزبەكستان» ساياباعىندا ءوتتى.
«جىلدار، عاسىرلار وتەدى. ءبىراق، ءبىزدىڭ ۇلتتىق مەملەكەتتىلىگىمىزدى، بولمىسىمىزدى جانە ادامي قۇقىعىمىزدى قالپىنا كەلتىرگەن تاۋەلسىزدىك كۇنى - بارلىق جەتىستىگىمىز بەن بەلەسىمىزدىڭ نەگىزى. ءبىز ءۇشىن، ءبىزدىڭ بولاشاق ۇرپاعىمىز ءۇشىن ءارقاشان ەڭ ۇلى جانە قىمبات مەرەكە بولادى»، - دەدى شاۆكات ميرزيەيەۆ سالتاناتتى سوزىندە.
ءوز سوزىندە وزبەكستان باسشىسى الداعى بەس جىلدا ەل دامۋىنىڭ باستى باعىتتارىنا اينالاتىن بەس باسىمدىقتى اتاپ ءوتتى.
بىرىنشىدەن، ءبىلىم بەرۋ سالاسىندا زاماناۋي ءبىلىم مەن داعدىلاردى الۋ ءۇشىن بارىنشا قولايلى جاعداي جاسالادى. وسى ماقساتتا مەكتەپ باعدارلامالارى، وقىتۋ ادىستەمەسى، وقۋلىقتاردىڭ مازمۇنى تۇبەگەيلى قايتا قارالادى.
ەكىنشىدەن، كەز كەلگەن داۋلى ماسەلەنىڭ ءادىل شەشىمىن تەك سوت تابۋى كەرەك. سۋديالاردىڭ جۇمىسىنا ارالاسۋ قاتاڭ جازالانادى، ولاردىڭ ەش كەدەرگىسىز جۇمىس ىستەۋى ءۇشىن بارلىق قاجەتتى جاعدايلار جاسالاتىن بولادى.
ۇشىنشىدەن، بيزنەستى دامىتۋ ەسەبىنەن قوسىمشا جۇمىس ورىندارى اشىلىپ، كەدەيشىلىك ازايادى، حالىقتىڭ تابىسى ارتادى. بۇل ءۇشىن جەكەمەنشىك پەن كاسىپكەرلىك جولىنداعى بارلىق كەدەرگىلەر جويىلادى. مەملەكەتتىك باسقارۋ رەفورمالانادى، ال مەملەكەتتىڭ ەكونوميكاعا قاتىسۋى كۇرت قىسقارادى.
تورتىنشىدەن، دەنساۋلىق ساقتاۋ جۇيەسىندە حالىقتىڭ نەعۇرلىم ساپالى جانە بىلىكتى مەديتسينالىق قىزمەتتەرگە قولجەتىمدىلىگى كەڭەيتىلەتىن بولادى. ادامدارعا مەديتسينالىق قىزمەتتەر قولجەتىمدى بولۋ ءۇشىن بارلىق ايماقتاردا جەدەل مەديتسينالىق كومەك كورسەتۋ كولەمى ارتادى.
بەسىنشىدەن، حالىقتى تازا اۋىز سۋمەن قامتاماسىز ەتۋ ماسەلەسى باستى نازاردا بولادى. سالاعا قۇيىلاتىن ينۆەستيتسيا كولەمى كۇرت كوبەيتىلەدى.
«وزبەكستان رەسپۋبليكاسىنىڭ مەملەكەتتىك تاۋەلسىزدىگىن جاريالاۋ تۋرالى» قاۋلى 1991-جىلى 31- تامىزدا وزبەكستان ك س ر جوعارعى كەڭەسىنىڭ كەزەكتەن تىس سەسسياسىندا قابىلدانعان. سول قۇجاتقا سايكەس، 1- قىركۇيەك - وزبەكستاننىڭ تاۋەلسىزدىگى كۇنى بولىپ جاريالاندى.
