جاسى 31 گە تاياعان قازاق قىزى: توقال الۋدى زاڭداستىرسا ەكەن
«بۇرىن مەن دە توقال دەگەنگە قارسى ەدىم. ال قازىر ومىردە كەيبىر نارسەلەردى ۋاقىتتىڭ سۇرانىسىنا قاراي وزگەرتۋگە بولادى دەپ سانايمىن. ماسەلەن، قازىر قوعامىمىزدا جاسى 27-28 دەن اسقان قىزدار وتە كوپ. تۇرمىس قۇرعىسى كەلمەيدى ەمەس، كەلەدى، تەك شاڭىراق كوتەرەيىك دەپ سەنىمدى تۇردە ايتا الاتىن لايىقتى ەر- ازامات جوق.
جاسىم بيىل 31 گە تولماق. ءبىراق تۇرمىسقا شىعا قويارلىقتاي جىگىت جوق. جاسىڭ 27 دەن اسقاسىن بىرەۋدىڭ ۇسىنىس ايتا قويمايتىنىنا دا كوزىڭ جەتە باستايدى ەكەن.
بۋحالتەرمىن. تۇراقتى ەكى جۇمىسىم بار. قوسىمشا كەيبىر ۇساق كومپانيالاردىڭ ەسەپ- قيسابىن جۇرگىزىپ بەرىپ اقشا تابامىن. ءبىر بولمەلى جاتاقحانام بار. ماتەريالدىق تۇرعىدا تاۋەلسىزبىن دەپ ايتا الامىن. ءبىراق جالعىز جۇرگەنىم جانىما باتادى. بىلتىردان بەرى جاسى 46 داعى قىزمەتتەس، وتباسىلى جىگىتپەن ارالاسىپ ءجۇرمىن. ول مەنىڭ وسى جاسقا دەيىن قىز بولىپ جۇرگەنىمە ءسۇيسىندى- اۋ دەيمىن، ارامىز سودان بەرى ۇزىلگەن ەمەس. ءبىراق ءبىر شاڭىراق استىنا تۇراتىنداي اڭگىمە ايتپايدى. شىنى كەرەك، بىرەۋدىڭ شاڭىراعىن بۇزاتىن ويىم جوق. ءبىراق ارالاساتىن قۇربىلارىمنىڭ وتباسىن، جاقىن- جۋىقتى كورىپ، سوڭعى كەزدەرى ەكىنشى ايەل بولساڭ دا وتباسىڭ بولعانى دۇرىس ەكەنىن، ونىڭ ايەل ادام ءۇشىن ماڭىزدىلىعىن سەزىنىپ ءجۇرمىن. ءوزىم «مەنى توقال قىلىپ ال» دەپ ايتۋعا نامىستانامىن.
بالالى بولعىم كەلەدى. بالانى ءوزىم ءۇشىن تۋعىم كەلەدى. ونى ايتىپ ءتۇسىندىردىم دە. «ەشقانداي اقشا تالاپ ەتپەيمىن، ءوزىم باعىپ- قاعامىن» دەپ الدىن- الا ايتتىم. جاسىرىپ كەرەگى نە، ءوزى دە گۇلىن الىپ كەلىپ تۇرادى، ارا- تۇرا سىيلىق جاسايدى. الايدا توقال رەتىندە قابىلداعىسى جوق. وسىندايدا توقال الۋعا نەگە رۇقسات ەتپەسكە دەپ ويلايمىن. سوندا ەڭ بولماسا بالاما اكەسىنىڭ تەگىن الىپ بەرە الامىن. ءوزىم تۋىستارىمنىڭ الدىندا جولداسىم دەپ تە قىسىلماي تانىستىرا الار ەدىم. توقال الۋعا رۇقسات بەرۋ تالاي جانباي قالعان شىراقتىڭ جانۋىنا سەبەپ بولار ەدى. شاڭىراقتاردىڭ سەبەپسىز بۇزىلۋىنىڭ الدىن الاتىنى دا انىق. سوندىقتان توقال الۋعا رۇقسات بەرسەك، قوعامداعى ءبىر ماسەلەنىڭ شەشىلگەنى بولار ەدى.
شىنىن ايتايىق، قازىر قوعامىمىزدا توقالى جوق ەر ادام كەمدە- كەم. تەك زاڭدى تۇردە رۇقساتتىڭ جوقتىعى ولاردى قينايتىن سياقتى. سوندىقتان توقال الۋدى زاڭداستىرساق دۇرىس بولار ەدى"، - دەيدى وقىرمان.
