اقتوبەدە 31 لاۋازىمدى تۇلعا جازاعا تارتىلدى

استانا. قازاقپارات - اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ مەملەكەتتىك ساتىپ الۋلار كونكۋرسىن دۇرىس ۇيىمداستىرماعانى ءۇشىن ايىپپۇل تولەيتىن بولدى. ونىمەن بىرگە باسقارمانىڭ تاعى ءبىر مامانى دا سوگىس الدى.

اتالعان مەملەكەتتىك ورگان وكىلدەرى وزىنە مىندەتتەلگەن جۇمىستاردى ورىنداماعان كومپانيانى سوتقا بەرۋدە جايباسارلىق تانىتقان. ناقتى ايتقاندا، كاسىپكەر جالپى قۇنى 891 مىڭ تەڭگە تۇراتىن ءسىبىر جاراسى مەن تۋليارەمياعا قارسى ەكپەنى دەر كەزىندە جەتكىزبەگەن.

سونداي-اق، تەكسەرۋ بارىسىندا دەنساۋلىق ساقتاۋ جانە ءبىلىم بەرۋ باسقارمالارىنىڭ تاعى ونداعان مامانى وسى ىسپەتتەس زاڭبۇزۋشىلىققا جول بەرگەنى انىقتالدى.

شاعىمداردىڭ بەلگىلەنگەن ۋاقىتتا سوتقا بەرىلمەۋى ولاردىڭ قاناعاتتاندىرىلماۋىنا الىپ كەلگەن. زاڭ تالاپتارىنا ات ءۇستى قاراعاندار قاتارىندا ەمبى جانە قوبدا اۋداندىق اۋرۋحانالارىنىڭ باس دارىگەرلەرى مەن كوللەدج باسشىلارى بار. ولاردىڭ بارلىعىنا ايىپپۇل سالىندى.

زارينا تولەبايەۆا، وبلىستىق پروكۋراتۋرانىڭ باسقارما پروكۋرورى:

- 31 لاۋازىمدى تۇلعا اكىمشىلىك جازاعا تارتىلدى، بارلىعىنان مەملەكەت پايداسىنا 2 ميلليون 299 مىڭ 120 تەڭگە كولەمىندە ايىپپۇل ءوندىرىلدى. 25 تۇلعاعا تارتىپتىك جازا قولدانىلدى، ولاردىڭ ىشىندە ەكى ادام جەمقورلىق سيپاتىنداعى قۇقىق بۇزۋشىلىق ءۇشىن جازالاندى.

www.24.kz