ەلىمىزدە چەمپيوندار ءومىر بويىنا اي سايىن 318 مىڭ تەڭگەدەن الىپ وتىراتىن بولدى

استانا. قازاقپارات - ەلىمىزدە وليمپيادا جەڭىمپازدارى مەن جۇلدەگەرلەرىنە جانە الەم چەمپيونى اتانعان سپورتشىلارعا بەرىلەتىن اي سايىنعى ماتەريالدىق تولەم مولشەرى ءوستى، دەپ حابارلايدى قازاقپارات ءتىلشىسى سپورت جانە دەنە شىنىقتىرۋ ىستەرى كوميتەتىنىڭ باسپا ءسوز قىزمەتىنە سىلتەمە جاساپ.

«قازاقستاندىق سپورتشىلار مەن جاتتىقتىرۋشىلارعا وليمپيادا، پاراليمپيادا، سۋردليمپيادا ويىندارى جەڭىمپازدارى مەن جۇلدەگەرلەرىنە جانە وليمپيادالىق سپورت تۇرلەرى بويىنشا الەم چەمپيونادارىنا ءومىر بويى بەرىلەتىن اي سايىنعى قامسىزداندىرۋ مولشەرى ءوستى. اتالعان تولەم وسىعان دەيىن 24 ايلىق ەسەپتىك كورسەتكىشتى (76380 تەڭگە) قۇراپ كەلگەن. بيىل مينيسترلىكتىڭ ۇكىمەتكە جاساعان ۇسىنىسى قولداۋ تاۋىپ، اي سايىنعى قامسىزداندىرۋ كولەمى 100 ا ە ك- كە دەيىن (318000 تەڭگە) ارتتى»، - دەلىنگەن حابارلامادا.

سونداي- اق، رەسمي اقپاراتتا ايتىلعانداي اتالعان تولەمدى الۋ ءۇشىن سپورتشىلار مەن باپكەرلەردىڭ سالا بويىنشا 20 جىل ەڭبەك ءوتىلى بولۋى ءتيىس.

«بۇل وزگەرىستەر تەك سپورتشىلاردى عانا ەمەس ولاردىڭ باپكەرلەرىنە دە قاتىستى. ياعني وليمپيادا، پاراليمپيادا، سۋردليمپيادا ويىندارىنىڭ جەڭىمپازدارى مەن جۇلدەگەرلەرىن جانە وليمپيادالىق سپورت تۇرلەرى بويىنشا الەم چەمپيونادارىن تاربيەلەگەن باپكەرلەرى دە ءومىر بويى الاتىن اي سايىنعى قامسىزداندىرۋعا قۇجاتتار تاپسىرا الادى»، - دەيدى كوميتەتتەن.