برازيليادا 312 ميلليون تەڭگەگە فۋتبول ۇيرەنگەن بالالار ەلگە ورالدى
ءسوز جوق، سوڭعى جىلدارى قازاق فۋتبولىندا جاڭالىقتار كوپ بولدى. ونىڭ بىرەۋى جاعىمدى بولسا، ەندى ءبىرى كوڭىلدەن شىققان جوق. سونىڭ ىشىندەگى باستى جاڭالىقتاردىڭ ءبىرى - قازاق جاستارىنىڭ برازيليادا فۋتبول اكادەمياسىندا ءتالىم الۋى.
بارشاڭىزعا جاقسى بەلگىلى، «ولە برازيل» مەكتەبىنىڭ ءبىرىنشى تۇلەكتەرى اسا مىقتى ناتيجە كورسەتە العان جوق ەدى. ال، ەندى ەكىنشىسى قالاي بولماق؟ وسىدان ءۇش جىل بۇرىن سايدىڭ تاسىنداي ىرىكتەلگەن جاس فۋتبولشى بالالار برازيلياعا بارىپ، فۋتبول الىپپەسىن تەرەڭىنەن ۇيرەنىپ، ءۇش جىل بويى تەك فۋتبولمەن عانا ءومىر سۇرگەن بالالار كەشە الماتىعا ورالدى.
نەگىزى، بۇل اكادەميامەن قازاقستان سوناۋ 2009-جىلى كەلىسىم-شارتقا كەلگەن. ەلباسى نۇرسۇلتان نازاربايەۆ برازيلياعا جاساعان ساپارىندا ەل پرەزيدەنتى لۋيس دا سيلۆامەن كەزدەسۋ بارىسىندا قازاقستاندىق جاستاردىڭ «ولە برازيل» اكادەمياسىندا جاتتىعۋىنا مۇمكىندىك جاساعان ەدى. ەكى ەل پرەزيدەنتتەرى كەلىسىمگە قول قويىسىمەن قازاقستاننان العاشقى لەك سپورتشىلار اتتانعان بولاتىن. 3 جىلدىق وقۋدى اياقتاسىمەن ولار استانادا جاڭادان قۇرىلعان «بايتەرەك» دەپ اتالاتىن كوماندانىڭ نەگىزىن قۇردى. العاشقى لەكتەن كوزگە تۇسكەندەر اراسىندا شابۋىلشى راۋان ساريەۆ پەن جارتىلاي قورعاۋشى بەرىك شايحوۆ عانا بولدى. ال، اكادەميادان دوپ تەبۋدى ۇيرەنگەن وزگە فۋتبولشىلار ۇشتى-كۇيلى جوق بولىپ كەتتى.
ءبىرى اۋەسقوي كوماندالاردا فۋتبول ويناپ جۇرسە، ەندى ءبىرى ءتىپتى ماماندىعىن دا وزگەرتىپ جىبەرگەن. ءتىپتى، 1 توپ وقۋ-جاتتىعۋدى باستاعاننان كەيىن 8 بىردەي بالانى «ولە برازيل» ەلگە قايتاردى. ولارعا ەشقانداي دا فۋتبولعا يكەمى جوق دەگەن ءۋاج ايتىلدى. بۇل جولى ونداي جاعداي ورىن المادى.
«ولە برازيل» اكادەمياسى وسى كۇنى قاعاز جۇزىندە جوق. بۇل ۇجىم بانكروتقا ۇشىراپ، ونىڭ بازاسى تۇگەل «بوتافوگو» فۋتبول كلۋبىنا وتكەن. ەندى قازاق جاستارى جاتتىعىپ جاتقان وقۋ ورنى «بوتافوگو-سوتسيال» فۋتبول اكادەمياسى دەپ اتالادى. سوندىقتان دا فۋتبول ويىنىنىڭ قىر-سىرىن مەڭگەرۋگە بارعان قازاقستاندىق ەكىنشى توپتىڭ بالالارى دا «ولە برازيل» اكادەمياسىندا ەمەس، «بوتافوگو» كلۋبىنىڭ اكادەمياسىندا ءتالىم الدى.
فۋتبولدىڭ مەككەسى بولىپ سانالاتىن برازيلياعا توپ تەبۋگە باراتىن فۋتبولشىلاردى ىرىكتەۋ وتە مىقتى بولعان ەكەن. بۇل تۋرالى فۋتبولشىلار مۇحيتتىڭ ارعى جاعىنا اتتانار الدىندا فۋتبولدان مەملەكەتتىك جاتتىقتىرۋشى بولاتبەك جۋاسبايەۆ ايتقان ەدى.
ىرىكتەۋدىڭ قورىتىندىسى بويىنشا، وڭتۇستىك قازاقستان وبلىسىنان - 5 فۋتبولشى، تارازدان - 4، اقتاۋ - 4، تالدىقورعان - 2، اتىراۋ - 2، قاراعاندى - 2، استانا - 1، الماتى - 1، قوستاناي - 1، ش ق و - 1 بالا، بارلىعى 25 فۋتبولشى ىرىكتەلگەن.
25 بالانىڭ 9 ايلىق وقۋ ماۋسىمىنا 104 ميلليون تەڭگە بولىنگەن. ال، ولاردىڭ 3 جىلدىق وقۋىنا جالپى سوماسى 312 ميلليون تەڭگە كەتەدى. دەمەك، ءار ايعا ءبىر بالاعا 2 مىڭ دوللاردان ەسەپتەلىنەدى.
ودان بولەك بيىل برازيلياعا ەكى باپكەر كەتكەن. الايدا، ول ماماندارعا اقشانى قازاقستان تاراپى ەمەس، «بوتافاگو» كلۋبىنىڭ باسشىلارى تولەگەن. سەبەبى، ولار اكادەميادا قاتارىندا تەك قازاقستاندىق بالالاردى عانا ەمەس، باسقا فۋتبولشىلاردى دا تاربيەلەگەن.
3 جىل بويى الادوپ ونەرىن ۇيرەنگەن بالالار كەشە ەلگە ورالدى. ولاردى اۋەجايدا اتا-انالارى مەن قازاقستان فۋتبول فەدەراتسياسىنىڭ وكىلدەرى، ۇلتتىق شتاتتاعى كوماندالار جانە سپورت رەزەرۆى ديرەكتسياسى سونداي-اق تىلشىلەر كۇتىپ الدى.
ال، بۇگىن ەلگە ورالعان بالالاردىڭ باسىن بىرىكتىرىپ ارنايى باسپا ءسوز جيىنى ءوتتى. جيىن بارىسىندا بالالار برازيليادا ءتالىم العان ۋاقىتى مەن مۇحيتتىڭ ارعى جاعىنان العان اسەرلەرىمەن ءبولىستى.
سونداي-اق باسپا ءسوز جيىنى كەزىندە بۇل بالالاردىڭ بولاشاعى تۋرالى دا اڭگىمە قوزعالىپ، ولاردىڭ الداعى ۋاقىتتا ۇلتتىق شتاتتاعى كوماندالار جانە سپورت رەزەرۆى ديرەكتسياسىمەن كەلىسىم-شارتقا وتىرعانى بەلگىلى بولدى. ەندى جاس فۋتبولشىلاردىڭ 2015-جىلى ارنايى ەمتيحان تاپسىرىپ استانا قالاسىنداعى رەسپۋبليكالىق كوللەدجگە تۇسۋگە مۇمكىندىكتەرى بار. جاس فۋتبولشىلاردىڭ تاعى ءبىر بولىگى 2015-جىلدان ەلوردالىق «بايتەرەك» كلۋبىندا ونەر كورسەتەدى ەكەن. ال، باقتارى جانعاندارى قازاقستان بىرىنشىلىگىندە ونەر كورسەتەتىن كلۋبتارعا جىبەرىلەدى.
بۇل جىگىتتەردىڭ 3 جىل بويى نە وقىپ، نە توقىعاندارىن كەلەر جىلى عانا كورە الامىز. سوندىقتان دا برازيلياعا بارعان ەكىنشى لەكتەگى بالالارعا ءمىن ايتۋ ءالى ەرتە.
دەگەنمەن، ءبىز مىنا ءبىر ءجايتتى ايتىپ كەتكەندى ءجون ساناپ وتىرمىز. ارينە، قازاق جاستارىنىڭ برازيليادا جاتتىعىپ كەلگەنىنەن ايتارلىقتاي زارداپ شەككەن جوقپىز. ءبىراق، وسى جوباعا كەتكەن قارجىعا وزگە ەۋروپالىق مەملەكەتتىڭ اكادەمياسىن جالداۋعا بولاتىن سەكىلدى. مىسالى، گوللانديا نەمەسە بەلگيا سەكىلدى كوپتەگەن ەلدەردەگى فۋتبول اكادەميالارىن قاراستىرىپ كورسەك، جامان بولماس ەدى. مىسالعا برازيليادا جاتتىققان قىتاي كومانداسى اكادەميا جۇمىسىنا كوڭىلى تولماي كەلىسىم-شارتتى بۇزدى. ولاردان وزگە جاتتىعىپ جاتقان بەنين مەملەكەتىنىڭ كومانداسىنا اسا قاتتى جوعالتاتىن ەشتەڭە جوق. ويتكەنى، ولاردىڭ قارجىسىن فيفا تولەۋدە. ەندى، كەلەسى ءۇشىنشى تولقىن جاستاردى برازيلياعا ەمەس، ەۋروپانىڭ ءبىر اكادەمياسىنا جىبەرۋدى ويلاستىرعان ءجون.
اۆتور: ۋاليحان قوسانباي
«الاش ايناسى»
