311 مىڭ ادام اقتالعان: ساياسي قۋعىن- سۇرگىن قۇرباندارىن اقتايتىن مەمكوميسسيا جۇمىسىن اياقتادى

  مەملەكەتتىك كەڭەسشى ەرلان قاريننىڭ توراعالىعىمەن ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسياسىنىڭ سوڭعى وتىرىسى ءوتتى، دەپ حابارلايدى Kazinform اقورداعا سىلتەمە جاساپ.

باسقوسۋدا مەملەكەتتىك كوميسسيانىڭ جانە ونىڭ ايماقتىق بولىمشەلەرىنىڭ جۇمىسى قورىتىندىلاندى.

وتىرىسقا قاتىسۋشىلار مەملەكەت باسشىسىنىڭ 2020 -جىلعى 24-قاراشاداعى جارلىعىنا سايكەس قۇرىلعان كوميسسيا ⅩⅩ عاسىردىڭ 20-50 -جىلدارىنداعى ساياسي قۋعىن- سۇرگىن قۇرباندارىن اقتاۋ ءۇشىن كەشەندى ءارى جۇيەلى جۇمىس جۇرگىزۋگە مۇمكىندىك بەرگەنىن اتاپ ءوتتى.

كوميسسيا، ەڭ الدىمەن، زەرتتەۋ- ىزدەۋ جانە جيناقتاۋ- تالداۋ جۇمىستارىنا باسا ءمان بەردى.

ونىڭ قىزمەتىن ۇيلەستىرۋ ءۇشىن جوبالىق كەڭسە قۇرىلىپ، قۇرامىنا عالىمدار، زەرتتەۋشىلەر جانە مەملەكەتتىك ورگانداردىڭ وكىلدەرى كىردى.

ءتۇرلى ساناتتاعى ساياسي قۋعىن- سۇرگىن قۇرباندارىن قامتۋ ءۇشىن ناقتى تاقىرىپتار بويىنشا بولىنگەن ءۇش عىلىمي توپ جاساقتالدى.

ءار وڭىردە ايماقتىق كوميسسيا قۇرىلدى.

مەملەكەتتىك كوميسسيا قۇرامىندا 425 عالىم مەن زەرتتەۋشى، ونىڭ ىشىندە 260 تان اسا مامان ايماقتىق كوميسسيادا ەڭبەك ەتتى.

ولار ەلىمىزدىڭ تۇكپىر- تۇكپىرىندەگى 60 تان استام مەملەكەتتىك جانە ۆەدومستۆولىق ارحيۆتە اۋقىمدى جۇمىس اتقاردى.

قازىردىڭ وزىندە 2,6 ميلليوننان استام قۇجات پەن ماتەريالدان قۇپيا بەلگىسى الىنىپ تاستالدى.

مەملەكەتتىك كوميسسيا ساياسي قۋعىن- سۇرگىنگە ۇشىراعان 311 مىڭنان استام ادامدى اقتاۋ ءۇشىن قولدانىستاعى زاڭناما اياسىندا ناقتى جۇمىس جۇرگىزدى.

زەرتتەۋ ناتيجەسىن عىلىمي تۇرعىدا راسىمدەۋ ءۇشىن مەملەكەتتىك كوميسسيا ماتەريالدارىنىڭ 72 تومنان تۇراتىن جيناعى ءبىر سەريامەن ازىرلەندى.

ساياسي قۋعىن- سۇرگىنگە قاتىستى زەرتتەۋ جۇمىسىن پرەزيدەنت تاپسىرماسىمەن قۇرىلعان XX عاسىرداعى ساياسي قۋعىن- سۇرگىن ماتەريالدارىن زەردەلەۋ ورتالىعى ارى قاراي جالعاستىرادى.

ارناۋلى مەملەكەتتىك ارحيۆتەردەن 2 جىل ىشىندە وسى ورتالىققا رەپرەسسيا قۇرباندارىنا قاتىستى 688 مىڭنان استام ءىس جانە 48 مىڭعا جۋىق ەسەپكە الۋ كارتوچكاسى بەرىلدى.

ورتالىق ⅩⅩ عاسىردىڭ 20-50 -جىلدارىنداعى ساياسي قۋعىن- سۇرگىن تۋرالى قۇجاتتاردى سيفرلى فورماتقا كوشىرىپ، ەلەكتروندى قور قالىپتاستىرادى.

ونىڭ ءبارى عالىمدارعا، زەرتتەۋشىلەرگە جانە قالىڭ كوپشىلىككە قولجەتىمدى بولادى.

وتىرىستىڭ سوڭىندا مەملەكەتتىك كوميسسيا مۇشەلەرى، عالىمدار، زەرتتەۋشىلەر، ساراپشىلار كوميسسيا جۇمىسىنا جانە عىلىمي- زەرتتەۋ قىزمەتىن جۇرگىزۋگە مەملەكەت تاراپىنان ءاردايىم قولداۋ كورسەتىلگەنى ءۇشىن پرەزيدەنتكە ريزاشىلىق ءبىلدىردى.