31 جىلدان سوڭ جەتكەن ماراپات: ءى ءى م- دە ەرلىكپەن قازا تاپقان پوليتسەيدىڭ ەسىمى ۇلىقتالدى
استانا. KAZINFORM - ىشكى ىستەر مينيسترلىگىندە وتان قورعاۋشى جانە ۇلى جەڭىس كۇندەرى اتاپ ءوتىلدى. ەل اماندىعى ءۇشىن كۇنى-ءتۇنى قىزمەت ەتىپ جۇرگەن ساقشىلار مەن ايبىندى ارداگەرلەرگە قۇرمەت كورسەتىلدى، - دەپ حابارلايدى Polisia.kz.
- وتان قورعاۋشىلار مەن جەڭىس كۇنى - رۋحى جاعىنان ءبىر-ءبىرىن تولىقتىراتىن، ۇرپاققا ساباق بولاتىن قوس تاريحي كۇندەر. كەشەگى جاۋ وعىنان قورعاعان مايدانگەرلەر، تىل ەڭبەككەرلەرى جانە بەيبىت زامان باتىرلارىنىڭ ەرلىكتەرىن ۇمىتپاۋ - ءبىزدىڭ قاستەرلى بورىشىمىز! - دەدى ىشكى ىستەر ءمينيسترى ەرجان سادەنوۆ.
ايتۋلى كۇنى ەكىنشى دۇنيەجۇزىلىك سوعىستىڭ ارداگەرى قۇرمات راحيموۆ «قۇرمەت» وردەنىمەن ماراپاتتالدى. سۇراپىل سوعىستا تاباندىلىعىمەن ەلدى جاۋدان قورعاعان اقساقال بۇگىندە 100 جاسقا تولىپ وتىر.
تاۋەلسىزدىك جىلدارى قىزمەت بابىندا ىشكى ىستەر ورگاندارىنىڭ 800 دەن استام قىزمەتكەرى كوز جۇمعان. سولاردىڭ ءبىرى - سولتۇستىك قازاقستان وبلىسىنىڭ لەنين اۋدانى ىشكى ىستەر باسقارماسىنىڭ اعا ينسپەكتورى اناتوليي دوبرىنين. ول 1993-جىلى پوليتسيا عيماراتىنا جاسالعان قارۋلى شابۋىلعا تويتارىس بەرۋ كەزىندە قازا تاپتى. قاسىنداعى ارىپتەسى سەرىك ورازالينمەن بىرگە قاسكويلەرگە قارسى تۇرىپ، تابەلدىك قارۋدى باسىپ الۋعا جول بەرمەدى.
- ەكى وفيتسەردىڭ ارەكەتى جوعارى باعالانىپ، مەملەكەتتىك ناگرادالار ءوز باتىرلارىن 31 جىلدان كەيىن تاپتى. ءبىز بۇل جۇمىستى جالعاستىرامىز. ارحيۆتەردى زەردەلەيمىز. ەرلىكتەرى باعالانباي، كولەڭكەدە قالىپ قويعان باتىرلاردىڭ ەسىمدەرىن ۇلىقتايتىن بولامىز! - دەدى ەرجان سادەنوۆ.
مارقۇم اناتوليدىڭ ماراپاتىن - «ەرلىگى ءۇشىن» مەدالىن باۋىرى يۋري دوبرىنين الدى.
مەرەكەلىك شارا كونسەرتتىك باعدارلاماعا ۇلاستى. ەلىم دەيتىن ەرلەردىڭ قۇرمەتىنە اۋەزدى اندەر شىرقالىپ، كۇمبىرلەگەن كۇي دە توگىلدى.
