31 جىل بۇرىن قۇلسارىداعى سۋ تاسقىنى قالاي بولعان
اتىراۋ. KAZINFORM - اتىراۋ وبلىسىنداعى جىلىوي اۋدانىنىڭ ورتالىعىن 1993 -جىلعى كوكتەمدە تاسقىن سۋ استىندا قالعان. سول كەزدە قۇلسارى كەنت اتالاتىن ەدى.
بۇدان 31 جىل بۇرىنعى سۋ تاسقىنىنا كۋا بولعان ءابدىحالىق سيسەنبەرديەۆتىڭ ايتۋىنشا، 1993 -جىلعى سۋ تاسقىنى تۋرالى الدىن الا حابارلانباعان.
اۋدان ورتالىعى - قۇلسارى كەنتى سول كەزدىڭ وزىندە بىرنەشە اۋىلعا بولىنگەن.
«قۇلسارىنىڭ ءدال قاسىندا قامىسكول دەپ اتالاتىن كول بار. بۇل كولگە سۋ جەم وزەنىنەن باستاۋ الاتىن قۇرساي وزەگىنەن قۇيىلادى. سول كەزدە وزەكتىڭ جاعالاۋى بيىكتەتىلمەدى. جەم وزەنىنەن قۇيىلعان سۋ قۇرساي وزەگىنىڭ ارناسىنان اسىپ، قۇلسارىداعى بىرنەشە اۋىلدى باستى»، - دەپ ەسكە الدى ءابدىحالىق سيسەنبەرديەۆ.
ونىڭ پىكىرىنشە، قۇلسارىنى باسقان تاسقىن سۋ ءبىر ايداي تۇرعان. كەيىن كوشەلەردەگى باتپاق تەز كەۋىپ ۇلگەرمەگەن.
«سول كەزدە 1 مىڭنان استام تۇرعىن ءۇيدى سۋ باستى. تۇرعىندار تاسقىن سۋدان ۇرەيلەنىپ، جان-جاققا قاشتى. قۇلسارىنىڭ شاعىن اۋداندارىندا بوس تۇرعان كوپقاباتتى ۇيلەرگە كىرۋگە ارەكەت جاسادى. ءبىراق، جەرگىلىكتى اكىمدىك قانشا ءۇيدىڭ بوس تۇرعانىن بىلمەدى، تۇرعىندارعا كىرۋگە مۇمكىندىك بەرمەدى. باسپاناسىز قالعاندار سول ۇيلەردىڭ ەسىگىن بۇزىپ كىرگەن ەدى»، - دەيدى ءابدىحالىق سيسەنبەرديەۆ.
تاسقىن سۋ كەتكەننەن كەيىن عانا تازالاۋ جۇمىسى باستالعان. سۋ باسقان ۇيلەردى جوندەۋ قولعا الىنعان.
«ارينە، تابيعي اپاتتان قۇلسارىنىڭ تۇرعىندارى زارداپ شەكتى. بۇل - شىندىق. زارداپ شەككەن تۇرعىندارعا نەگىزىنەن قۇرىلىس ماتەريالدارى، ۋاقىتشا پانالاۋ ءۇشىن بىرنەشە كيىز ءۇي، كەيبىرىنە اقشالاي كومەك بەرىلدى. اقشالاي كومەكتى مەكەمەلەر ۇسىندى. ءبىراق، باسپاناسى بۇلىنگەن تۇرعىنداردىڭ ءبارى بىردەي قامقورلىققا الىندى دەي المايمىز. كوپتەگەن تۇرعىن باسپانانى وزدەرى سالدى. كەيىن تەڭىزشيەۆرويل كومپانياسى قۇلسارىدا ءبىر قاباتتى 20 ءۇي سالىپ بەردى»، - دەيدى ءابدىحالىق سيسەنبەرديەۆ.
جەم وزەنى سۋىنىڭ اعىسىن باسەڭدەتۋ ءۇشىن قىزىلقوعا اۋدانىنداعى مۇقىر اۋىلىنان قۇلسارىعا تىكەلەي قاتىنايتىن جول ەكى- ءۇش جەردەن بۇزىلعان.
سونداي- اق، جىلىوي اۋدانىنىڭ ومارتوعاي ۋچاسكەسىندەگى جانە بۇرىنعى «ەمبى» كەڭشارىنىڭ اۋماعىنداعى « قىزىلجار» وتكەلدەردى بۇزۋعا تۋرا كەلگەن.
«سول 1993 -جىلعى سۋ تسقىنىنىڭ ءبىر سەبەبىن عانا ايتقان ءجون. بۇل - قۇرساي وزەگىنىڭ جاعالاۋى ابدەن شوگىپ، الاسارعانى. قۇلسارىداعى اۋىلداردى سۋ باسقاننان كەيىن عانا وزەكتىڭ جاعالاۋى بيىكتەتىلە باستادى. ءبىراق، بۇل وتە كەش ەدى»، - دەدى سۋ تاسقىنىنىڭ كۋاگەرى.
ەسكە سالا كەتەلىك، بۇعان دەيىن اتىراۋداعى جىلىوي اۋدانىنان 35 مىڭعا جۋىق تۇرعىن ەۆاكۋاتسيالانعانىن جازعان ەدىك.
