الماتىدا مەكتەپ جانىنداعى لاگەرگە باراتىن 30 مىڭنان استام وقۋشى تەگىن تاماقتانادى
ول ءۇشىن جەرگىلىكتى بيۋدجەتتەن 250 ميلليون تەنگە ءبولىندى. بۇل تۋرالى ەربولات دوسايەۆ تۇركسىب اۋدانى تۇرعىندارىمەن كەزدەسۋى بارىسىندا ايتتى، دەپ حابارلايدى قازاقپارات ءتىلشىسى.
«قازىر مەكتەپتەردە جازعى لاگەرلەر اشىلدى. ۋاقىتىلى تاماقتانۋ بالالار ءۇشىن وتە ماڭىزدى، ءبىراق بۇل كوپتەگەن اتا- انالار ءۇشىن قىمبات. شەشىم بار ما؟» ، - دەپ سۇرادى قالا باسشىسىمەن كەزدەسۋگە كەلگەن تۇركسىب اۋدانىنىڭ تۇرعىنى.
ەربولات دوسايەۆ مەكتەپ جانىنداعى لاگەرلەرگە باراتىن باستاۋىش سىنىپ وقۋشىلارى تەگىن تاماقتاناتىنىن جەتكىزدى.
«بيىل ءبىز مۇنداي ماسەلەگە ەرەكشە نازار اۋداردىق. 1 دەن 4-سىنىپقا دەيىنگى بالالار ءۇشىن 10 كۇندىك مەكتەپ جانىنداعى لاگەرلەرگە 250 ميلليون تەڭگە بولۋگە كەلىسىم بەردىم. 30 مىڭنان استام بالانى تەگىن تاماقپەن قامتاماسىز ەتەمىز. ءبارى جاقسى بولادى»، - دەدى ول.
ايتا كەتەيىك، بالالار مەكتەپ جانىنداعى لاگەرلەرگە ساعات 9:00 دەن 15:00 گە دەيىن 10 كۇن بارادى. الەۋمەتتىك جاعدايىنا قاراماستان ىستىق تاماق بارلىعىنا تەگىن بەرىلەدى.
سونداي- اق، از قامتىلعان جانە كوپبالالى وتباسىلاردان شىققان 3500 دەن استام وقۋشى، اتا- اناسىنىڭ قامقورلىعىنسىز قالعان بالالار مەن جەتىمدەر جەرگىلىكتى بيۋدجەت ەسەبىنەن جازعى قالا سىرتىنداعى دەمالىسپەن قامتىلاتىن بولادى.
