رەسەيدى 30 دان استام ەل وليمپيادادان شەتتەتۋدى قولدادى

استانا. قازاقپارات- دۇنيەجۇزىنىڭ 30 دان استام مەملەكەتى رەسەي مەن بەلارۋس سپورتشىلارىن حالىقارالىق جارىستاردان شەتتەتۋ تۋرالى باستامانى قولدادى. بۇل جونىندە Reuters ۇلى بريتانيا ۇكىمەتىنىڭ مالىمەتىنە سۇيەنىپ حابارلادى.

ا ق ش، فرانسيا مەن ۇلى بريتانيا قول قويعان بىرلەسكەن مالىمدەمەدە باستاماعا رەسەيدىڭ ۋكرايناعا جاساعان شابۋىلى تۇرتكى بولعانى كورسەتىلگەن.

«رەسەي مەن بەلارۋس سپورتشىلارى جارىستارعا بەيتاراپ ستاتۋسپەن قاتىسىپ جۇرگەنىمەن، ولاردى مەملەكەتتەرى قارجىلاندىرىپ وتىرعانى بەلگىلى» دەپ جازىلعان مالىمدەمەدە.

قۇجاتتا «بەلارۋس پەن رەسەي سپورتشىلارى حالىقارالىق سپورت قاۋىمداستىعىنا ءوز ەلدەرى باستاعان سوعىس اياقتالعان كەزدە عانا قوسىلا الادى» دەپ جازىلعان.

ۋكراينا پرەزيدەنتى ۆلاديمير زەلەنسكي بيىل اقپاننىڭ باسىندا رەسەي سپورتشىلارىن وليمپيا ويىندارىنان شەتتەتۋ كەرەك دەپ مالىمدەگەن. ليتۆا، لاتۆيا، ەستونيا مەن پولشا سپورت مينيسترلەرى دە وسىعان ۇقساس مالىمدەمە جاساعان.

حالىقارالىق وليمپيادا كوميتەتى قاڭتاردىڭ اياعىندا ۋكرايناداعى سوعىسقا اشىق قارسى شىققان رەسەي مەن بەلارۋس سپورتشىلارىن حالىقارالىق جارىستارعا بەيتاراپ تۋ استىندا قاتىستىرا بەرۋدى ۇسىنعان.

2022 -جىلى 24- اقپاندا، پەكيندە قىسقى وليمپيادا اياقتالىسىمەن رەسەي ۋكرايناعا باسىپ كىرگەن.