قازاقستاندا جەڭىل ونەركاسىپ سالاسىندا 30 مىڭ ادام جۇمىس ىستەيدى
بۇل تۋرالى «اتامەكەن» ۇلتتىق كاسىپكەرلەر پالاتاسىندا وتكەن جيىندا يندۋستريالىق دامۋ كوميتەتى جەڭىل ونەركاسىپ باسقارماسىنىڭ باسشىسى ايجان ءادىلوۆا مالىمدەگەن. سالانى دامىتۋ ماسەلەلەرىنە ارنالعان ءىس-شاراعا مەملەكەتتىك ورگانداردىڭ، سالالىق قاۋىمداستىقتاردىڭ جانە وتاندىق كاسىپورىنداردىڭ وكىلدەرى قاتىستى.
جيىن بارىسىندا ۆەدومستۆو وكىلى بىلتىرعى كورسەتكىشتەرگە توقتالىپ، الداعى كەزەڭگە ارنالعان جوسپارلار تۋرالى حاباردار ەتتى.
«2022-جىلدىڭ قورىتىندىسى بويىنشا قازاقستاندا جەڭىل ونەركاسىپتەگى ءوندىرىس كولەمى 6 پايىزعا ارتىپ، 178 ميلليارد تەڭگەگە جەتتى. ايتالىق، توقىما بۇيىمدارىنىڭ ءوندىرىسى 5,3 پايىزعا، كيىم ءوندىرىسى 7,8 پايىزعا، سونداي-اق بىلعارى جانە ونىمەن بايلانىستى ونىمدەردىڭ كولەمى 3,7 پايىزعا وسكەن»، - دەدى ا. ءادىلوۆا.
سونىمەن قاتار باسقوسۋدا ماقتا، ءجۇن، تەرى جانە بىلعارىنى وڭدەۋ ماسەلەلەرىنە ەرەكشە نازار اۋدارىلدى. بۇدان بولەك، وتاندىق برەندتەردى ىنتالاندىرۋ بويىنشا ۇسىنىستار قاراستىرىلدى.
«انىقتالعان تابىستى باعىتتار مەملەكەتتىك شىعىندى ازايتىپ، ءبىراق سالا وندىرىسىنە ايتارلىقتاي اسەر ەتەتىن كيىم ءوندىرىسىنىڭ سەگمەنتتەرىن دامىتۋدىڭ مۇمكىندىگىن كورسەتىپ وتىر. وسىعان وراي شەتەلدە وتاندىق مامانداردى وقىتۋعا سۋبسيديا بەرۋ جانە ەلىمىزدىڭ برەندتەرىنىڭ مەملەكەتتىك دەڭگەيدە اقپاراتتىق سۇيەمەلدەۋىن قامتاماسىز ەتۋ ماسەلەسىن پىسىقتاۋ قاجەت»، دەدى جەڭىل ونەركاسىپ باسقارماسىنىڭ باسشىسى.
قازىر قازاقستاندا جەڭىل ونەركاسىپ سالاسى باعىتىندا جۇمىس ىستەيتىن 1420 كاسىپورىن تىركەلىپ، شامامەن 30 مىڭ ادام ەڭبەك ەتەتىنىن ايتا كەتەيىك.
