تۇركياداعى ءزىلزالا قۇرباندارىنىڭ سانى 30 مىڭعا جۋىقتادى
بۇل تۋرالى ەلدىڭ توتەنشە جاعدايلاردىڭ الدىن الۋ جانە سالدارىن جويۋ باسقارماسى (AFAD) ءمالىم ەتتى، دەپ حابارلايدى قازاقپارات انادولۋ اگەنتتىگىنە سىلتەمە جاساپ.
AFAD مالىمەتتەرى بويىنشا ەپيورتالىعى كاحرامانماراشتاعى پازاردجيك جانە ەلبيستان اۋداندارىندا بولعان ەكى جەر سىلكىنىسىنەن كەيىن 2412 افتەرشوك تىركەلگەن.
جويقىن ءزىلزالا قۇرباندارىنىڭ سانى 12-اقپان تۇركيا ۋاقىتىمەن ساعات 15:55 تە 29605 ادامعا جەتتى.
ەسكە سالساق، 6-اقپاندا تۇركيادا جەتى بالدان اساتىن ەكى جەر سىلكىنىسى بولدى. جۇزدەگەن افتەرشوكپەن جالعاسقان جەراستى ءدۇمپۋى ەلدىڭ 10 پروۆينسياسىندا، سونداي-اق كورشىلەس مەملەكەتتەردە دە سەزىلدى. سونىڭ ءبىرى - سيريا، ونداعى قۇرباندار سانى 3574 كە جەتتى.
ايتا كەتسەك، قازاقستان توتەنشە جاعدايلار مينيسترلىگىنىڭ قۇتقارۋشىلارى دا تۇركيادا ىزدەستىرۋ- قۇتقارۋ جۇمىستارىن جۇرگىزىپ جاتىر. ولار 7 ادامدى قۇتقارىپ، مەديتسينا قىزمەتكەرلەرىنە تاپسىردى. قايتىس بولعان 19 ادامنىڭ، ونىڭ ىشىندە ءبىر بالانىڭ دەنەسى ءۇيىندى استىنان شىعارىلدى.
قازاقستاندىق قۇتقارۋشىلار كومانداسىنىڭ قۇرامىنداعى ت ج م رەسپۋبليكالىق جەدەل- قۇتقارۋ جاساعىنىڭ باس قۇتقارۋشىسى ءبىرجان بايقۇلوۆ بۇگىن قىزدى بولدى.
وكىنىشكە قاراي، جەر سىلكىنىسى قۇرباندارىنىڭ اراسىندا قازاقستاندىقتار دا بار. ق ر س ءى م باسپا ءسوز قىزمەتى تاراتقان مالىمەتكە ساي، 7-اقپاندا مينيسترلىكتىڭ جەدەل جەلىسىنە 4 دوس جەر سىلكىنىسىنەن كەيىن بايلانىسقا شىقپاي قالعانى تۋرالى قوڭىراۋ تۇسكەن. سولاردىڭ ءبىرى - سابينا مامادياروۆا امان تابىلىپ، قولىنا وتا جاسالدى. ال، ميربولات (ميرۋس) قۇرماشەۆ پەن ءادىل قادىربەكوۆتىڭ دەنەلەرى تابىلعان ەدى، مارقۇمداردىڭ مايىتتەرى ەلگە جەتكىزىلدى. ميربولات قۇرماشەۆتى كەشە الماتىدا تۋعان-تۋىستارى مەن دوستارى اقتىق ساپارعا شىعارىپ سالدى.
قىرعىزستان رەسپۋبليكاسى سىرتقى ىستەر مينيسترلىگىنىڭ باسپا ءسوز قىزمەتى تۇركيادا بولعان جەر سىلكىنىسىنەن قىرعىز ازاماتى قازا تاپقانىن مالىمدەدى.
سونداي-اق، تۇركيانىڭ كەيبىر اۋداندارىندا قۇتقارۋشىلار ىزدەستىرۋ جۇمىسىن توقتاتۋعا ءماجبۇر ەكەنى حابارلاندى.