دۇنيەجۇزى قازاقتارى قۇرىلتايىنا 30 جىل
استانا. قازاقپارات - ءبىرىنشى دۇنيەجۇزى قازاقتارى قۇرىلتايىنا 30 جىل. وسىعان وراي استانادا حالىقارالىق فورۋم ءوتتى، دەپ حابارلايدى «حابار 24».
القالى جيىنعا ەۋروپادان، ءازىربايجان، موڭعوليا، تۇركيا، رەسەي، وزبەكستان ەلدەرىندەگى اعايىن كەلدى.
شەتەلدەگى قازاق دياسپورالارىنىڭ جۇمىسى، كوشى- قون، وتانداستارىمىزدىڭ جاھاندىق الەمگە بەيىمدەلۋ ماسەلەلەرى قاراستىرىلدى. التىناي ءجۇنىسوۆا - ومبىداعى قانداستارىمىزدىڭ ۇكىلى ءۇمىتىن ارقالاپ جۇرگەن قازاقتاردىڭ ءبىرى. ول وسىدان 30 جىل بۇرىنعى دۇنيەجۇزى قازاقتارى قۇرىلتايىنا دا قاتىسىپ، سان قازاقتىڭ قۋانىشىنا كۋا بولعان. ول كەزدە شەتتەن كەلگەن قانداستاردىڭ اراسىندا ەڭ جاس وكىل ەدىم دەپ ەسكە الدى. ءقازىر ومبىداعى قازاق مادەني ورتالىعىن باسقارىپ قانا قويماي، انا ءتىلىن ساقتاپ قالۋ ءۇشىن جان ۇشىرىپ ءجۇر. قازاق بالالارىن وزدەرى شىعارعان قازاق ءتىلدى كىتاپپەن وقىتۋدى قولعا العان.
«ءوزىمىز قازىر رەسەيدەگى قازاقتار بىرىگىپ، قازاق تىلىنەن وقۋلىقتار جاسادىق. ءقازىر تيپاگرافيادا دايىن تۇر. سول وقۋلىقتارمەن بالالارىمىزدى وقىتىپ جاتىرمىز. دومبىرا، بي، ۆوكال ۇيىرمەلەرى بار. قازاق كۇرەسىن، توعىز قۇمالاقتى جاڭعىرتامىز. بۇگىنگى كۇنى قازاقتار كوپ تۇراتىن اۋدانداردا قازاق مادەني ورتالىقتارى اشىلىپ جۇمىس ىستەپ جاتىر. ال ناۋرىز بولسىن، بالالارىمىزبەن ۇلكەن شارا ۇيىمداستىرامىز»، دەيدى رەسەيلىك «ءمولدىر» مادەني ورتالىعىنىڭ وكىلى التىناي ءجۇنىسوۆا.
وسى تۇستا تاريحقا ءسال شەگىنىس جاساپ، دۇنيەجۇزى قازاقتارى قۇرىلتايىنا توقتالساق. العاش رەت 1992 -جىلى 30-قىركۇيەكتە الەمنىڭ 33 ەلىنەن 800-دەن اسا قانداس الماتىداعى قۇرىلتايدا باس قوستى.
ءدال سول جيىندا دۇنيەجۇزى قازاقتارىنىڭ قاۋىمداستىعىن قۇرۋ ماسەلەسى قارالدى. ەكىنشى قۇرىلتاي 2002 -جىلى تۇركىستاندا ءوتتى. ودان كەيىنگى جاھان قازاقتارىنىڭ باسىن قوسقان جيىندار 2005، 2011، 2017 -جىلدارى استانادا ۇيىمداستىرىلدى. سول جىلدارى كوتەرىلگەن ازاماتتىق، قانداس مارتەبەسى، جاستاردىڭ اتامەكەندە ءبىلىم الۋى سياقتى ءبىرقاتار ماسەلە بۇگىندە ءوز شەشىمىن تاپقان. ال، بۇگىنگى حالىقارالىق فورۋمدا دا كوشى-قون، شەتەلدەگى قازاقتارمەن مادەني بايلانىستى دامىتۋ ماسەلەلەرى تالقىلاندى.
«1992 -جىلعى قازاققا ءۇمىت بەرگەن تاريحي وقيعانىڭ ماڭىزدىلىعىن كورسەتۋدى ءۇمىت ەتىپ وتىرمىز. مىنە، بۇگىن 12 ەلدەن ونلاين دا، وففلاين دا قانداس باۋىرلارىمىز قاتىسىپ وتىر»، دەيدى ق ر تۇڭعىش پرەزيدەنت كىتاپحاناسى ديرەكتورىنىڭ ورىنباسارى بوتاگوز قايىپوۆا.
جيىنعا كەلگەن قانداستاردىڭ تىلەگى ءبىر. اتامەكەنمەن اراداعى مادەني- رۋحاني بايلانىس ۇزىلمەسە دەيدى. قازاق كارتاسىن ەنگىزۋ، ازاماتتىق، قانداس مارتەبەسى، ءبىلىم الۋ ماسەلەلەرىن جەڭىلدەتۋ سياقتى سۇراقتار وڭ شەشىمىن تابادى دەگەن ۇمىتتە. بۇگىندە تورتكۇل دۇنيەگە تارىداي شاشىلعان قازاقتىڭ سانى 6 ميلليوننان اسقان. الەمنىڭ 40-تان استام ەلىندە قازاق دياسپوراسى بار. ال، ەلىمىز تاۋەلسىزدىك العاننان بەرى اتامەكەنگە 1 ميلليوننان استام قانداس ورالعان.
