جيناقتاۋ جۇيەسىنە قاتىسۋشىلاردىڭ زەينەتاقىسى 30 مىڭ تەڭگەگە جوعارى بولادى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى رۋسلان ساكەيەۆ ساۋىردەن باستاپ بازالىق جانە ىنتىماقتى زەينەتاقى تولەمدەرىنىڭ كولەمى قالاي وزگەرگەنىن ءتۇسىندىردى، دەپ حابارلايدى قازاقپارات ءتىلشىسى.
None
None

«بۇگىندە ەلىمىزدىڭ 4 ميلليون 200 مىڭعا جۋىق ازاماتى ءار ءتۇرلى الەۋمەتتىك تولەمدەر الىپ وتىر. ولاردىڭ 2 ميلليون 300 مىڭى عانا زەينەتكەرلەر. 1 ميلليون 200 مىڭعا جۋىعى كوپبالالى وتباسىلار. شامامەن 700 مىڭعا جۋىعى مۇگەدەكتىگى بار ازاماتتار. بيىل زەينەتاقىلاردى تولەۋگە 3 تريلليون 64 ميلليارد تەڭگە قاراستىرىلىپ وتىر. ونىڭ ىشىندە 2 تريلليون 960 ميلليارد تەڭگە رەسپۋبليكالىق بيۋجەتتەن بولىنەدى. بۇل ەڭبەك جانە حالىقتى الەۋمەتتىك قورعاۋ مينيسترلىگىنىڭ بارلىق شىعىندارىنىڭ 67 پايىزىن قۇرايدى. بۇل سوما ورتاق جانە بازالىق زەينەتاقى تولەمدەرىنە باعىتتالادى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.

ونىڭ سوزىنە قاراعاندا، جيناقتاۋشى زەينەتاقى قورىنان جاسىنا بايلانىستى جيناقتاۋشى زەينەتاقى تولەۋ ءۇشىن 104 ميلليارد تەڭگە قاراستىرىلىپ وتىر.

«جيناقتاۋشى زەينەتاقىنى قوسپاعاندا ىنتىماقتى جانە بازالىق زەينەتاقىنىڭ ورتاشا جيىنتىق مولشەرى 1- ساۋىردە 105337 تەڭگەنى قۇراسا، 1- ساۋىردەن كەيىن 109346 تەڭگەنى قۇرايدى. جيناقتاۋشى زەينەتاقىنى قوسىپ ەسەپتەگەندە ىنتىماقتى جانە بازالىق جيناقتاۋشى زەينەتاقىنىڭ ورتاشا جيىنتىق مولشەرى 1- ساۋىرگە دەيىن 133337 تەڭگە بولسا، 1- ساۋىردەن كەيىن 138616 تەڭگە بولادى. جيناقتاۋشى زەينەتاقى جۇيەسىنە قاتىسۋشىلار زەينەتاقىسىنىڭ ورتاشا مولشەرى شامامەن 30 مىڭ تەڭگەگە جوعارى بولادى»، - دەدى رۋسلان ساكەيەۆ.

ۆيتسە-ءمينيستردىڭ مالىمەتى بويىنشا، ەكىنشى دۇنيەجۇزىلىك سوعىس مۇگەدەكتەرى اي سايىن 201 مىڭ تەڭگەدەن الىپ وتىر.

سوڭعى جاڭالىقتار