قازاقستاندا ءسۇت ءوندىرىسىنىڭ وزىندىك قۇنى ورتا ەسەپپەن 30 پايىزعا ءوستى

نۇر-سۇلتان. قازاقپارات - قازاقستاندا ءسۇت ءوندىرىسىنىڭ وزىندىك قۇنى كاسىپورىننىڭ شاماسىنا قاراي 23 تەن 65 پايىزعا دەيىن ارتتى.

بۇل جايىندا ق ر ءسۇت وداعىنىڭ ديرەكتورى ۆلاديمير كوجيەۆنيكوۆ ءمالىم ەتتى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، ءسۇت ءوندىرىسى الەۋمەتتى ماڭىزى بار سالا سانالادى جانە قازاقستاندىق تۇتىنۋشىلاردىڭ ءونىمنىڭ قاجەتتى كولەمىمەن قامتاماسىز ەتىپ وتىر.

وتاندىق وندىرۋشىلەر نارىقتىڭ 95 پايىزىن ءسۇت جانە ءسۇت ونىمدەرىمەن قامتيدى.

دەگەنمەن، وداق ديرەكتورى ءسۇتتى قايتا وڭدەپ جاسالاتىن ونىمدەردى شىعارۋعا كەلگەندە جاعداي كۇردەلى ەكەنىن ايتادى.

«لوگيستيكالىق تىزبەك ءۇزىلىپ قالدى. ءبىز كوپتەگەن ينگرەديەنتتەردى، ونىڭ ىشىندە قاپتامانى رەسەيدەن الامىز. مۇنىڭ ءبارىن قايتادان جولعا قويۋ ءۇشىن ۋاقىت كەرەك. ءبىراق، بۇل ونىمگە دە تاۋەلدىلىگىمىز تومەندەي ءتۇستى. الايدا، رەسەي-ۋكراين وقيعالارىنا بايلانىستى وزگەرىستەر كوپ قيىندىق تۋعىزىپ وتىر. مۇنىڭ ءبارى ءونىمنىڭ وزىندىك قۇنىنا، سوعان وراي باعاسىنا اسەر ەتۋدە. دۇكەنگە بارعان كەزىڭىزدە باعانىڭ كۇن سايىن بولماسا دا، اپتا سايىن وزگەرەتىنىن كورىپ جۇرسىزدەر. بىزدە ءونىمنىڭ وزىندىك قۇنىنىڭ 65-75 پايىزىن شيكىزات الادى.

ال ءدال وسى شيكىزات بۇگىندە 65 پايىزعا قىمباتتاپ وتىر. بۇل - ءسۇت وداعىنىڭ ەمەس، ف ا و- نىڭ (ب ۇ ۇ ازىق-تۇلىك جانە اۋىل شارۋاشىلىعى ۇيىمى) مالىمەتتەرى. بۇل ۇيىم شىنايى جايتتى اسىرەلەۋگە مۇددەلى ەمەس»، - دەدى ول «اتامەكەن» ۇ ك پ الاڭىندا وتكەن باسپا ءسوز ءماسليحاتىندا.

وداق ديرەكتورىنىڭ دەرەگىنشە، ءسۇت ءوندىرىسىنىڭ وزىندىك قۇنى شاعىن شارۋاشىلىقتاردا 65، ال ءىرى شارۋاشىلىقتاردا 23 پايىزعا ارتقان. مۇنداي ايىرماشىلىق ءىرى شارۋاشىلىقتاردا قويمالاردىڭ بار-جوعىنا، مال ازىعى قورىنىڭ جەتكىلىكتىلىگىنە بايلانىستى. ال شاعىن شارۋاشىلىقتاردىڭ مۇنداي مۇمكىندىكتەرى جوق.

«تولىقتاي العاندا ءسۇتتى قايتا وڭدەۋدىڭ وزىندىك قۇنى 30 پايىزعا ءوسىپ وتىر»، - دەدى ۆلاديمير كوجيەۆنيكوۆ.