الماتىدا «ءشامشىسىز وتكەن 30 جىل» اتتى ەسكە الۋ كەشى ءوتتى
كەشتىڭ ماقساتى - ش. قالداياقوۆتىڭ مۋزىكالىق شىعارماشىلىعىن كەڭىنەن ناسيحاتتاۋ، ونىڭ شىعارمالارى ارقىلى جاستاردىڭ سۇلۋلىققا دەگەن سۇيىسپەنشىلىك سەزىمدەرىن ارتتىرۋ، ونەردى تانۋعا باۋلۋ. ءىس- شاراعا بەلگىلى ارتىستەر، مادەنيەت جانە ونەر قايراتكەرلەرى، كومپوزيتوردىڭ تۋىستارى، كىتاپحانا قىزمەتكەرلەرى، باق وكىلدەرى قاتىستى. كەش بارىسىندا جينالعاندار سانالى عۇمىرىن ساز الەمىنە ارناعان كومپوزيتور تۋرالى ەستەلىكتەر ايتىپ، ءشامشى ونەرىنىڭ ماڭىزىنا توقتالدى.
سونىمەن قاتار «ءان اعا»، «اقماڭدايلىم»، «جاقسىگۇل»، «باقىتتىمىن قۇربىلار»، «ءانىم سەن ەدىڭ» سياقتى تانىمال اندەر شىرقالدى. سونداي- اق «ءشامشى» دەرەكتى فيلمىنەن ءۇزىندى كورسەتىلىپ، «مەنىڭ قازاقستانىم» ءان ۇرانى ورىندالدى.
ەسكە الۋ كەشى اياسىندا قازاق حالقىنىڭ مۋزىكالىق مۇراسىندا وشپەس ءىز قالدىرعان كورنەكتى كومپوزيتورعا ارنالعان كىتاپ جانە بەزەندىرىلگەن كورمە ۇيىمداستىرىلدى، ونىڭ ءومىرى مەن شىعارماشىلىعىنىڭ تاريحىن قامتيتىن شىعارمالارى مەن ادەبيەتى ۇسىنىلدى. ءشامشى قالداياقوۆ 1930 -جىلى، 15 -تامىز كۇنى وتىرار اۋدانىنىڭ ءشاۋىلدىر اۋىلىندا تۋعان.
كومپوزيتور. شىمكەنت، تاراز، جەتىساي قالالارىنىڭ قۇرمەتتى ازاماتى. تانىمال اندەر جازۋداعى تابىسى ءۇشىن 1965 -جىلى قازاقستان لەنين كومسومولى سىيلىعىنىڭ لاۋرەاتى اتاندى. ال 1991 -جىلى وعان قازاقستان رەسپۋبليكاسىنىڭ حالىق ءارتىسى قۇرمەتتى اتاعى بەرىلدى. قازاق مۋزىكاسىنىڭ التىن قورىندا ءشامشىنىڭ 100 گە جۋىق ءانى بار.
