مەملەكەت باسشىسى: بيىل قازاقستان-رەسەي ديپلوماتيالىق بايلانىسىنىڭ 30 جىلدىعىن اتاپ وتەمىز
قازاقستان پرەزيدەنتى قاسىم-جومارت توقايەۆ رەسەيلىك ارىپتەسى ۆلاديمير پۋتينمەن وتكەن كەلىسسوزدەردەن كەيىنگى ب ا ق وكىلدەرىنە جاساعان بىرلەسكەن مالىمدەمەسىندە وسىلاي دەدى، دەپ حابارلايدى قازاقپارات ءتىلشىسى.
«بۇل جىل - ءبىزدىڭ مەملەكەتتەر ءۇشىن ايتۋلى جىل. مەملەكەتتەرىمىز اراسىنداعى ديپلوماتيالىق قارىم-قاتىناستاردىڭ 30 جىلدىعىن اتاپ وتەمىز. وسى ۋاقىت ارالىعىندا دوستىقتىڭ بەرىك ارقاۋىنا، تاريحىمىزدىڭ ورتاقتىعىنا، حالىقتارىمىزدىڭ مەنتالدىق جاقىندىعىنا سۇيەنىپ، شىنىمەن دە ۇلگى بولارلىق مەملەكەتارالىق ارىپتەستىك قۇردىق»، - دەدى قازاقستان پرەزيدەنتى.
ونىڭ ايتۋىنشا، ۇدەمەلى ساياسي ديالوگتىڭ ارقاسىندا ەكى مەملەكەت بۇكىل باعىتتار بويىنشا تاڭعالارلىق تابىستارعا جەتكەن.
«ءبىزدىڭ ارامىزداعى الەمدەگى ەڭ ۇزاققا سوزىلىپ جاتقان قۇرلىقتاعى شەكارامىز حالىقارالىق قاۋىمداستىققا ناعىز ۇلگى بولارلىق بەرەكەلى كورشىلەستىكتىڭ، سەنىمدى ارىپتەستىكتىڭ جانە ساياسي سەرىكتەستىكتىڭ جارقىن مىسالى بولىپ وتىر دەر ەدىم»، - دەدى مەملەكەت باسشىسى.
ايتا كەتەيىك، رەسەي فەدەراتسياسىنىڭ استاناسىندا ق ر پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين كەلىسسوز جۇرگىزدى.
مەملەكەت باسشىسىنىڭ رەسەيگە جۇمىس ساپارى اياسىندا ءبىرقاتار قۇجاتقا قول قويىلدى.
