تاۋەلسىزدىككە 30 جىل: مىڭنان استام اقمولالىق شاڭعى جارىسىنا قاتىستى - فوتو
اكسيا قىسقى سپورت تۇرلەرى مەن سالاۋاتتى ءومىر سالتىن ناسيحاتتاۋ ماقساتىندا ۇيىمداستىرىلدى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.
شاڭعى جولىنا شىققاندار ءار ءتۇرلى جاستاعى جانە ءار سالادا ەڭبەك ەتەتىن ءبىر مىڭنان استام اقمولالىق. ولاردىڭ ەڭ جاسى سەگىزدە، ەڭ ۇلكەنى 80 شاماسىندا جارىسقا قاتىسۋشىلاردى وبلىستىق دەنە شىنىقتىرۋ جانە سپورت باسقارماسىنىڭ باسشىسى اسەت بۇكىبايەۆ قۇتتىقتاپ، جارىس جولىندا جەڭىس تىلەدى.
«بارلىعىڭىزعا ۋاقىت ءبولىپ، وسى جارىسقا قاتىسقان ءۇشىن العىسى بىلدىرەمىن. جىل سايىن وسىنداي اۋقىمدى سپورتتىق ءىس- شارالاردىڭ كۋاسى بولىپ كەلەمىز. جازدا ۆەلوجارىستار، مارافوندار وتكىزەمىز، قىستا كونكي مەن شاڭعىمەن سىرعاناپ جارىسامىز. بۇل شارالاردىڭ بارلىعى وڭىرىمىزدە بۇقارالىق سپورتتى دامىتۋعا ىقپال ەتەدى»، - دەپ اتاپ ءوتتى اسەت بۇكىبايەۆ.
شاڭعى جارىسىنىڭ ەڭ ۇلكەن قاتىسۋشىسى ۆالەري ساگايداچىي 80 جاستا. قاريا سپورتپەن شۇعىلدانۋدىڭ ارقاسىندا ءوزىن كەرەمەت سەزىنەتىنىن ايتادى.
«مەن شاڭعىمەن مەكتەپتە اينالىسا باستادىم. سودان بەرى جىل سايىن شاڭعى سپورتپەن شۇعىلدانىپ كەلەمىن. وسىنىڭ ارقاسىندا ءوزىمدى سەرگەك، جاقسى سەزىنەمىن. كۇن سايىن تاڭعى جاتتىعۋدان كەيىن شاڭعىمەن سىرعانايمىن. جاستارعا سپورتپەن شۇعىلدانۋعا كەڭەس بەرەمىن»، - دەدى ارداگەر سپورشى.
ايتا كەتەيىك، سوڭعى جىلدارى وڭىردە دەنە شىنىقتىرۋ جانە سپورتپەن اينالىساتىن ازاماتتار سانى ارتىپ كەلەدى. بۇگىندە بۇل وبلىس تۇرعىندارىنىڭ شامامەن 36 پايىزى سپورتپەن اينالىسادى. وبلىس تۇرعىندارىنا سپورت جانە جاتتىعۋ زالدارى، باسسەيندەر، ستاديوندار جانە دەنە شىنىقتىرۋ- ساۋىقتىرۋ ورتالىقتارى قىزمەت كورسەتەدى. تەك وسى جىلدىڭ وزىندە سپورت عيماراتتارىنىڭ سانى 39 نىسانعا كوبەيدى. قازىرگى ۋاقىتتا ولاردىڭ سانى 2521 قۇرايدى.
