تەگەراندا قازاقستان تاۋەلسىزدىگىنىڭ 30 جىلدىعى اتاپ ءوتىلدى
ءىس-شارانىڭ جوعارى مارتەبەلى قوناقتارىنىڭ قاتارىندا ي ي ر اۋىل شارۋاشىلىعى دجيھادى ءمينيسترىنىڭ ورىنباسارى م. عورباني، ي ي ر ءماجىلىسىنىڭ دەپۋتاتى - سەرپىلىس جانە ءوندىرىستى وركەندەتۋ جونىندەگى ارنايى كوميتەتى ءتوراعاسىنىڭ ورىنباسارى - ي ي ر- ق ر پارلامەنتتىك دوستىق توبىنىڭ باسشىسى ع. نۋري عەزەلدجە، ي ي ر ساۋدا، ونەركاسىپ، كەن جانە اۋىل شارۋاشىلىعى پلاتاسىنىڭ ورىنباسارى م. كارباسي، ي ي ر سىرتقى ىستەر مينيسترلىگى ەۋرازيا دەپارتامەنتىنىڭ باس ديرەكتورى ءا. حاعيعيان، ي ي ر س ءى م كوپجاقتى جانە حالىقارالىق ەكونوميكالىق ىنتىماقتاستىق دەپارتامەنتىنىڭ باس ديرەكتورى س. الاۆي، يراننىڭ وزگە دە مەملەكەتتىك ورگاندارىنىڭ، تەگەراندا تىركەلگەن شەتەلدىك ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى، يراندىق كورنەكتى قوعام قايراتكەرلەرى، عىلىمي، شىعارماشىلىق زيالى قاۋىم جانە قازاق دياسپوراسىنىڭ وكىلدەرى - جالپى، 150 دەن اسا ادام قاتىستى.
سالتاناتتى قابىلداۋدا يرانداعى ق ر ەلشىسى ا. ورازباي ءسوز سويلەپ، قازاقستان ءوز تاۋەلسىزدىگىنىڭ 30 جىلى ىشىندە ەكونوميكالىق رەفورمالاردى ءساتتى جۇزەگە اسىردى، ناتيجەسىندە كەڭەستىك ۇلگىدەگى جوسپارلى ەكونوميكا الەمدىك ساۋدا-ەكونوميكالىق جۇيەگە تولىقتاي ينتەگراتسيالانعان ەركىن نارىقتىق ەكونوميكاعا كوشتى دەپ اتاپ ءوتتى.
سونىمەن قاتار، ەلشى تاۋەلسىزدىك جىلدارى قازاقستانعا كەلگەن تىكەلەي شەتەلدىك ينۆەستيتسيا 380 ميلليارد دوللارعا جەتكەنىن، بۇل ورتالىق ازياعا تارتىلعان شەتەلدىك ينۆەستيتسيالاردىڭ جالپى كولەمىنىڭ %75 ىنان استامىن قۇرايتىنىن مالىمدەدى.
ەلشى ا. ورازباي ءسوزىنىڭ جالعاسىندا قازاقستاننىڭ ماڭىزدى جەتىستىكتەرىنىڭ قاتارىندا ۇلتارالىق جانە كونفەسسياارالىق كەلىسىمنىڭ بىرەگەي مودەلى قالىپتاسقانىن، كورشى مەملەكەتتەرمەن، سونىڭ ىشىندە رەسەيمەن جانە قىتايمەن شەكارا تولىقتاي دەليميتاتسيالانعانىن، سونداي-اق كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويۋ ناتيجەسىندە تەڭىز شەكارالارىنىڭ دەليميتاتسيالانعانىن اتادى.
ەلشى قازاقستاننىڭ تاۋەلسىزدىك العان تۇستا الەمدەگى ءتورتىنشى يادرولىق ارسەنالدان ءوز ەركىمەن باس تارتقانى جانە سەمەي يادرولىق سىناق پوليگونىن جاپقانى حالىقارالىق قوعامداستىق مويىنداعان حالىقارالىق قاۋىپسىزدىككە قوسقان زور ۇلەسى بولعانىن اتاپ كورسەتتى.
ا. ورازباي قازاقستان-يران قارىم-قاتىناسىنىڭ دامۋى تۋرالى بولەك ايتا كەلە، قازاقستان تاۋەلسىزدىك العان كۇننەن باستاپ ەكىجاقتى قارىم-قاتىناستار ءارقاشان ەكىجاقتى دەڭگەيدە دە، كوپجاقتى فورماتتا دا ءوزارا قولداۋعا نەگىزدەلگەن ساياسي ديالوگتىڭ جوعارى سەرپىنىمەن سيپاتتالىپ كەلە جاتقانىنا باسا توقتالدى. ەكى مەملەكەتتىڭ اراسىنداعى تاۋار اينالىمى 2021-جىلدىڭ 9 ايىندا 2020 -جىلدىڭ وسى كەزەڭىمەن سالىستىرعاندا 2,2 ەسەگە وسكەنى اتاپ كورسەتىلدى.
ي ي ر ۇكىمەتىنىڭ اتىنان قابىلداۋ ءراسىمىنىڭ باس قوناعى بولعان ي ي ر اۋىل شارۋاشىلىعى دجيھادى ءمينيسترىنىڭ ورىنباسارى م. عورباني ءسوز الىپ، قازاقستان 30 جىل ىشىندە ساياسي، ەكونوميكالىق، اكىمشىلىك-باسقارۋ، عىلىمي، تەحنولوگيا سالالارىندا ايتۋلى جەتىستىكتەرگە قول جەتكىزگەنىن جوعارى باعالادى.
بۇدان وزگە، يران مەن قازاقستان پارلامەنتتىك دوستىق توبىنىڭ ءتوراعاسى ع. نۋري عەزەلدجە ءوز سوزىندە قازاقستان رەسپۋبليكاسىنىڭ ەگەمەندى دامۋ جىلدارىنداعى جەتىستىكتەرىن جوعارى باعالاپ، وسى رەتتە ەكى ەل اراسىنداعى پارلامەنتارالىق ىنتىماقتاستىقتىڭ ماڭىزدى ءرولىن اتاپ ءوتتى. ءىس-شارا باعدارلاماسىنىڭ ەرەكشە بولىگى رەتىندە تەگەران ونەر ۋنيۆەرسيتەتىنىڭ سكريپكاشىلارى قازاقتىڭ حالىق مۋزىكاسى مەن تانىمال قازاقستاندىق كومپوزيتورلاردىڭ اۋەندەرىن ورىندادى.
سونداي-اق قوناقتار نازارىنا قازاقستاننىڭ جەتىستىكتەرى مەن قازاقستان-يران قارىم-قاتىناسىنىڭ دامۋى تۋرالى بەينەفيلم مەن فوتوكورمە ۇسىنىلدى.
سونىمەن قاتار قازاقتىڭ ۇلتتىق تاعامدارى ۇسىنىلدى.
